މި އަހަރުގެ ތިމާވެށީގެ ދުވަހު ފަސް މިލިއަން ގަސް އިންދުމުގެ މަޝްރޫޢު ފަށާނެ ކަމަށް ތިމާވެށްޓާއި ހަކަތައާ ބެހޭ ވަޒީރު ތޯރިގް އިބްރާހިމް ވިދާޅުވެއްޖެއެވެ.

ތިމާވެށްޓާއި ހަކަތައާ ބެހޭ ވުޒާރާއިން ފާއިތުވެދިޔަ 6 މަސްދުވަހު ކޮށްފައިވާ ފާހަގަކޮށްލެވޭ މަސައްކަތްތަކާއި ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު ތޯރިގް ވިދާޅުވީ، ބައިނަލްއަގުވާމީ ތިމާވެށިގެ ދުވަހުގެ ގޮތުގައި ފާހަގަކުރާ ޖޫން މަހުގެ 5 ވަނަ ދުވަހު، ރާއްޖެއިން 5 މިލިއަން ގަސް އިންދުމުގެ މަޝްރޫއުއެއް އިފްތިތާހް ކުރެވިގެންދާނެ ކަމަށެވެ.

ވަޒީރު ތޯރިގް ވިދާޅުވީ، މީގެ މުހިންމު ކަމަކީ ތިމާވެށިގެ ސަބަބުން ލިބޭ ގެއްލުން ކުޑަކޮށް، ރާއްޖޭގެ ތިމާވެށީގައި ނެތި ދިޔުމުގެ ބޮރު ހީވެފައިވާ ގަސްގަހާއިގެހި އާލާކޮށް، ރާއްޖެ ހޫނުވުން ކުޑަ ކުރުން ކަމަށެވެ.

Advertisement

މި މަސައްކަތުގެ ތެރެއިން މަޝްރޫއުގައި އިންދުމަށް އަހަންމިޔަތުކަންދޭ ގަސްގަހާއިގެހި ދެނެގަނެ، ލޭންޑް ޔޫސް ޕްލޭނާއި އެއްގޮތަށް ގަސް އިންދާނެ ސަރަހައްދުތައް ފާހަގަކޮށް، ގަސްތަކަށް ނާސަރީ ހަދާނެ ސަރަހައްދުތައް ކަނޑައަޅައި، ނާސަރީ ގާއިމު ކުރުމުގެ މަސައްކަތް ފެށިފައިވާ ކަމަށް ވަޒީރު ތޯރިގް ވިދާޅުވިއެވެ.

އެގޮތުން މި މަޝްރޫއުގެ ދަށުން ހަތަރު ކެޓަގަރީއެއްގެ ގަސް ހޮވާފައިވާކަމަށާއި، އޭގެ ތެރޭގައި ނެތިގެންދިޔުމުގެ ބިރު ހީވެފައިވާ ގަހާއި، މޭވާ އަޅާ ގަހާއި، ހިޔާ ލިބޭ ގަހާއި، ދިވެހި ރާއްޖޭގެ ބޭސްވެރިކަމަށް ބޭނުންވާ އެކި ބާވަތުގެ ގަހުގެ އިތުރުން މާގަސް ހިމެނޭ ކަމަށް ވަޒީރު ވިދާޅުވިއެވެ.