ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ދޭތެރޭ އިރާދަކުރެއްވިއްޔާ މައްސަލައެއް ނުޖެހޭނެކަމަށް ރައީސުލްޖުމްހޫރިއްޔާގެ ޚާއްޞަ އެޑްވައިޒަރު ޢަބްދުއްރަޙީމް ޢަބްދުﷲ (އަދުރޭ) ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން ޢަބްދުއްރަޙީމް ވިދާޅުވީ މާޒީއަށް ބެލިނަމަވެސް އެއްވެސް މައްސަލައެއް ދިމާނުވެ ޕާޓީއާއި ސަރުކާރު ހިންގޭނެކަމުގެ ފުރިހަމަ ޔަޤީންކަން ޔަޤީންކަން އެބައޮތްކަމަށެވެ.
އަމިއްލަފުޅު ތަޖުރިބާގެ އަލީގައި އަބްދުއްރަޙީމް ވިދާޅުވީ ސަރުކާރާ މެންބަރުންނާ ދެމެދު މައްސަލަތައް ދިމާވަނީ މެންބަރުންނާއި ރައީސާ ބައްދަލުނުކުރެވި ގިނަ ދުވަސްވާތީކަމަށެވެ. އަދި ވިހިވަނަ މަޖިލީހުގެ ޕާލިމަންޓްރީ ގްރޫޕާއި ރައީސުލްޖުމްހޫރިއްޔާއާއި ދެމެދު އޮތީ ވަރަށް ގާތް ގުޅުމެއް ކަމަށާއި، އެ ގުޅުމުގެ ސަބަބުން، ކޮންމެ މެންބަރަކަށްވެސް ރައިސުލްޖުމްހޫރިއްޔާއާއި ވާހަކަ ދެއްކޭނެ ކަމަށް އަބްދުއްރަޙީމް ވިދާޅުވިއެވެ.
"އަޅުގަނޑާ ރައީސް ޑރ. މުޢިއްޒާ ދޭތެރޭ އިރާދަކުރެއްވިއްޔާ އެއްވެސް މައްސަލައެއް ދިމާ ނުވާނެ. މަޖިލީހާ ސަރުކާރާ ޖެހޭކަށް އަޅުގަނޑުމެން ޖާގައެއް ނުދޭނަން. އެއަށްވުރެ ބޮޑަށް ގުޅިގެން އެކީގައި މަސައްކަތްކުރާނީ. އޭގެ މާނައަކީ ދެބާރު އެއްވަނީއެކޭ ނޫން."
ޢަބްދުއްރަޙީމް ޢަބްދުﷲ ވިދާޅުވިއެވެ.
މިރޭގެ ޕްރޮގްރާމުގައި ޢަބްދުއްރަޙީމް އިތުރަށް ވިދާޅުވީ، ރައްޔިތުންގެ މަޖިލީހުގެ ބޮޑު އަޣުލަބިއްޔަތެއް ސަރުކާރު ހިންގާ ޕާޓީއަށް ދިނީ ރައްޔިތުންގެ އުންމީދުތަކެއް އެޕާޓީއާއި މިހާރުގެ ވެރިކަމާއި، އަދި އަދުގެ ރައީސުލްޖުމްހޫރިއްޔާއާއި ގުޅިފައިވާތީކަމަށެވެ. އެހެންކަމުން ރައްޔިތުން ބޭނުންވާ ކަންތައްތައް ކުރުމަކީ އަމާޒަކަށް ވާނެ ކަމަށްވެސް ޢަބްދުއްރަޙީމް ވިދާޅުވިއެވެ.
"ވިހި ވަނަ ރައްޔިތުންގެ މަޖިލީހުގެ މަަސައްކަތްތްތައް ބައްޓަން ކުރާނީ ރައްޔިތުން ބޭނުންވާ ގޮތަށް. ޚާއްސަކޮށް ސަރުކާރު ހިންގާ ޕާޓީއަށް ނިސްބަތްވެވަޑަިއގަންނަވާ މެންބަރުންނާ، އަދި ސަރުކާރާ ގުޅިގެން މަސައްކަތް ކުރައްވާ މެންބަރުންވެސް. އަޅުގަނޑުމެންގެ މުޅި އަމާޒަކަށް ވާނީ ރައީސް ޑރ. މުޙައްމަދު މުޢިއްޒު އެ މަނިކުފާނުގެ މި މެނިފެސްޓޯ ތަންފީޒު ކުރުމަށްޓަކާ އަޅުގަނޑުމެންގެ ފަރާތުން (ރައްޔިތުންގެ މަޖިލީހުގެ ފަރާތުން) ދޭން ޖެހޭ އެހީތެރިކަމާ އެއްބާރުލުން ވީ އެންމެ އަވަސް ފުރުސަތެއްގެ ތެރޭގަ ހަމަޖެހިފަ އޮންނަ އުސޫލާ ހަމަތަކުގެ މަތިން ފޯރުކޮށްދިނުން. "
އަބްދުއްރަޙީމް ވިދާޅުވިއެވެ.
ވިހިވަނަ ރައްޔިތުންގެ މަޖިލީހުގެ ރައީސަކަށް ރައީސުލްޖުމްހޫރިއްޔާގެ ޚާއްޞަ އެޑްވައިޒަރު ޢަބްދުއްރަޙީމް ހަމަޖައްސަވާފައިވާއިރު، 75 ގޮނޑިއާއެކު، މަޖިލީހުގެ ސުޕަރ މެޖޯރިޓީ ވެރިކަން ކުރާ ޕާޓީއިން ހޯދާފައިވާކަން ފާހަގަކޮށްލެވެއެވެ. މި ބޮޑު އަޣްލަބިއްޔަތާއެކު، ސަރުކާރާ ގުޅިގެން މަސައްކަތް ކުރުން، އެއްވެސް ދަތިކަމަކަށް ނުވާނެ ކަމަށާއި، ބައިބައިވުމަށް ޖާގައެއް ނޯންނާނެ ކަމަށްވެސް އަބްދުއްރަޙީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
