20 ވަނަ ރައްޔިތުންގެ މަޖިލިސް ވެގެންދާނީ “އިއްޒަތްތެރި” ކިޔަން އެކަށޭނަ މެންބަރުން އުޅޭ މަޖިލީހަކަށް ކަމަށް މަޖިލީހުގެ ފޮނަދޫ ދާއިރާގެ އިންތިޚާބީ މެންބަރު އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު، އަބްދުއްރަހީމް އަބްދުالله (އަދުރޭ) ވިދާޅުވެއްޖެ އެވެ.

ދައުލަތުގެ މީޑިއާގެ “ރާއްޖެ މިއަދު” ޕްރޮގްރާމްގައި ވާހަކަ ދައްކަވަމުން އަދުރޭ ވިދާޅުވީ ރައްޔިތުންގެ ކުރިމަތީގައި މަޖިލީހުގެ އަގު މިހާރު ވަނީ ވަރަށް ބޮޑުތަނުން  ވެއްޓިފައި ކަމަށެވެ. އެހެން ދިމާވެފައިވަނީ ނިމިދިޔަ މަޖިލިސް ތަކުން ފެނިފައިވާ މަންޒަރު ތަކުން ކަމަށްވެސް އޭނާ ވިދާޅުވިއެވެ. 

އަބްދުއްރަހީމް ވިދާޅުވި ގޮތުގައި، ނިމިދިޔަ 19 ވަނަ ރައްޔިތުންގެ މަޖިލީހުގައި އެމްޑީޕީގެ ސުޕަމެޖޯރިޓީ އޮތް އިރު، އެ މެންބަރުންނާއި އޭރުގެ ރައީސުލްޖުމްހޫރިއްޔާވެސް އިސްކުރެއްވީ ގައުމުގެ މަސްލަހަތަށްވުރެ އަމިއްލަ މަސްލަހަތު ކަމަށެވެ. އޭގެ ނަތީޖާއެއްގެ ގޮތުން ރައްޔިތުންނަށް ފައިދާވާނެ ކަންކަން މަޖިލީހުގެ ތެރެއިން ކުރެވިގެން ނުދިޔަ ކަމަށެވެ.

އެހެން ނަމަވެސް، 20 ވަނަ ރައްޔިތުންގެ މަޖިލީހުގައި ސުޕަ މެޖޯރިޓީ ހޯދާފައިވާ ޕީއެންސީގެ މަޖިލީސް މެންބަރުން އެކަން ބަދަލުކޮށް ރައްޔިތުން ބޭނުންވާ ގޮތަށް މަސައްކަތް ކުރައްވާނެ ކަމަށް އަދުރޭ ވިދާޅުވި އެވެ. އަދި އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒާއި މަޖިލީހަށް އިންތިޚާބުވެވަޑައިގެންފައިވާ ޕީއެންސީ މެންބަރުންވެސް އަމިއްލަ މަސްލަހަތަށް މަސައްކަތް ނުކުރައްވާނެ ކަމަށް އަދުރޭ ވިދާޅުވި އެވެ.

މިއާއެކު، އަދުރޭ ވިދާޅުވީ 20 ވަނަ ރައްޔިތުންގެ މަޖިލީހުން މިހާރު ރައްޔިތުންގެ މަޖިލީހަށް ގެއްލިފައި އޮތް އިތުބާރު އަލުން ހޯދާނެ ކަމަށެވެ. އަދި އެ މަޖިލީހުގެ މަސައްކަތްތައް ބައްޓަންކުރާނީ ރައްޔިތުން ބޭނުންވާ ގޮތަށް ކަމަށް އޭނާ ވުދާޅުވިއެވެ. 

އަދުރޭ ވިދާޅުވީ 20 ވަނަ ރައްޔިތުންގެ މަޖިލީހަށް ދާދި ފަހުން އިންތިހާބުވެވަޑައިގަތް މެންބަރުންގެ ކިބައިން އަހުލާގީ ގޮތުން ދަށް ފެންވަރުގެ ކަންތައްތައް ފެނުމުގެ ފުރުސަތު ނުދެއްވާނެ ކަމަށެވެ.

އަދުރޭ ވިދާޅުވީ، ތިންބާރު ވަކިވެފައި އޮތުމުގެ މާނައަކީ އެއްބާރުން އަނެއް ބާރަށް އަރައިގަތުން ނޫން ކަމަށެވެ. އެހެނެއް ކަމަކު އެއީ އެއްބާރުން އަނެއް ބާރަށް ދޭން ޖެހޭ އެއްބާރުލުން ދެމުން، އެއްބާރުން އަނެއް ބާރަށް ފާރަވެރިވުން ކަމަށްވެސް އޭނާ ވިދާޅުވުއެވެ.

ކަންމިހެން ހުރި ނަމަވެސް، 19 ވަނަ މަޖިލީހުން ވޭތުވެދިޔަ 6 މަސްދުވަހުގެ ތެރޭގައި ފެނިގެން ދިޔައީ، ސަރުކާރަށް ޖެއްސުން ކުރުމުގެ ގޮތުން މަސައްކަތް ކުރި ތަން ކަމަށް އަދުރޭ ވިދާޅުވިއެވެ. އެގޮތުން، އެ ަމަޖިލީހުގެ ދައުރު ވެފައިވަނީ ދިވެހި ތާރީހުގައިވެސް ކެބިނެޓްގެ ބައެެއް ވަޒީރުންނަށް ރުހުން ދިނުމަށް އިންކާރު ކުރި ފުރަތަަމަ މަޖިލީހަށް ކަން އަދުރޭ ފާހަގަކުރެއްވި އެވެ. އެއާއި ހިލާފަށް މިފަހަރު އިންތިހާބުވި މެންބަރުން މަސައްކަތްކުރައްވާނީ ރައީސް މުއިއްޒުގެ މެނިފެސްޓޯއަށް އެއްބާރުލުން ދޭނެ މަޖިލީހަކަށް ކަމަށް އަދުރޭ ވިދާޅުވި އެވެ.