ޕަޕުއާ ނިއު ގިނީގައި ބިންގަނޑު ކަނޑައިގެން ދިޔުމުގެ ހާދިސާއެއް ހިގައި، 300 އަށް ވުރެ ގިނަ މީހުން ބިންގަނޑުގެ އަޑީގައި ތާށިވެއްޖެއެވެ.

ޕަޕުއާ ނިއު ގިނީގެ އުތުރުގައި އޮންނަ އެންގާ ޕްރޮވިންސްގެ ކައޯކަލަމް އަވަށުގައި ހިނގި މި ހާދިސާގައި 1،100 ގެ ވަޅުލެވިފައިވާއިރު، އެތައް ސަތޭކަ ބަޔަކު މަރުވެދާނެ ކަމުގެ ބިރު އޮތް ކަމަށް އެގައުމުގެ ނޫސްތަކުން އަންނަނީ ރިޕޯޓް ކުރަމުންނެވެ.

އޮސްޓްރޭލިއަން ބްރޯޑްކާސްޓިން ކޯޕަރޭޝަނުން ހޮނިހިރު ދުވަހު ރިޕޯޓްކޮށްފައިވާ ގޮތުގައި މަރުވި މީހުންގެ އަދަދު އިތުރުވާނެ ކަމަށް ބެލެވޭއިރު، އެ ސަރަހައްދަށް އެހީތެރިކަން ފޯރުކޮށްދިނުމަށާއި، މީހުން ހޯދުމުގައި ހަރަކާތްތެރި ވަމުންދާ ޓީމްތަކަށް މިހާތަނަށް ހަތަރު ހަށިގަނޑު ވަނީ ފެނިފައެވެ.

Advertisement

މި ހާދިސާގެ ސަބަބުން އެ ސަރަހައްދަށް އެއްގަމު މަގުން ދަތުރުކުރުން ބަންދުވެފައިވާތީ، އެ ސަރަހައްދާއި ހިސާބަށް ހަމައެކަނީ ދެވެނީ ހެލިކޮޕްޓަރުގެ ޒަރީއާއިންނެވެ.

މިކަމާއި ގުޅިގެން އދ ގެ އޮފިޝަލް ސެރްހާން އަކްޓޮޕްރަކް ވިދާޅުވީ، އެ ސަރަހައްދަކީ 3،000 އަށް ވުރެ ގިނަ މީހުން ބޯހިޔާވަހިކަން ހޯދަމުން އައި ސަރަހައްދެއް ކަމަށާއި، ބިންގަނޑު ކަނޑައިގެން ދިޔުން އަދިވެސް ނުހުއްޓޭތީ، ވަޅުލެވިފައިވާ މީހުން ހޯދުމަށް ގޮންޖެހުންތަކަކާއި ކުރިމަތިލާން ޖެހިފައިވާ ކަމަށެވެ.

މި ހާދިސާގެ ސަބަބުން އެ ސަރަހައްދުގެ ރައްޔިތުން ގެންގުޅެމުން އައި ދިރޭތަކެތީގެ ފާމްތަކާއި އެނޫން ވެސް އެހެން ދަނޑުތަކާއި ސާފު ފެން ލިބޭނެ ހުރިހާ މަގެއް ވަނީ ބަންދުވެފައެވެ.