ދިވެހި ގައުމީ ތަރިކައިގެ ކޮލެޖް ގާއިމު ކުރުމުގެ އެންމެފަހު މަސައްކަތް މިހާރު ކުރެވެމުންދާކަމަށް ދިވެހި ބަހާއި ސަގާފަތާއި ތަރިކައިގެ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ.
ދިވެހި ބަހާއި ސަގާފަތާއި ތަރިކައިގެ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ނަސީރު ވިދާޅުވީ، ދިވެހި ގައުމީ ތަރިކައިގެ ކޮލެޖް ގާއިމު ކުރުމުގެ ކަރުދާހީ މަސައްކަތް ނިމިފައިވާކަމަށާއި، އެ މަސައްކަތް މިހާރު އޮތީ ކޮލެޖަށް ބޭނުންވާ އިދާރީ ބޭފުޅުންގެ ނަންފުޅުތައް ފޮނުވުމާއި ހިސާބުގައި ކަމަށެވެ.
"ދިވެހި ގައުމީ ތަރިކައިގެ ކޮލެޖް ގާއިމު ކުރުމުގެ މަސައްކަތް އޭގެ ކަރުދާހީ މަސައްކަތް ނިމި، ކޮލެޖަށް ބޭނުންވާ އިދާރީ ބޭފުޅުންގެ ނަންފުޅުތައް ފޮނުވުމާއި ހިސާބުގައި މިހާރުއޮތީ، އަޅުގަނޑުމެން އެމަސައްކަތް ކުރަމުން އެބަ ގެންދަން."
ވަޒީރު ނަސީރު ވިދާޅުވިއެވެ.
ހަމައެއާއިއެކު، އެ ކޮލެޖްގައި ކިޔަވައިދިނުމަށް ހަމަޖެހިފައިވާ ބައެއް މުގައްރަރުތައް ނިމިފައިވާކަމަށާއި، އޭގެ ތެރޭގައި ހިމެނޭ ތާރީހާއި ބެހޭ މުގައްރަރު ވެސް އެކުލަވާލައި ނިމިފައިވާކަމަށެވެ.
ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅު ތަކުގެ ތެރޭގައި ހިމެނޭ ދިވެހި ބަހާއި ތަރިކަ ދިރުވާ އާލާކުރުމަށްޓަކައި ދިވެހި ބަހާއި ސަގާފަތާއި ތަރިކައިގެ ވުޒާރާއިން އަންނަނީ މައިގަނޑު ތިން މަޝްރޫއުއެއް ހިންގަމުންކަމަށާއި، އޭގެ ތެރޭގައި ދިވެހި ގައުމީ ތަރިކައިގެ ކޮލެޖް، ދިރާސާ ކުރުމަށް ހާއްސަ މަރުކަޒު އަދި ގައުމީ ޗާޕްހާނާ ގާއިމް ކުރުމުގެ މަޝްރޫއު ހިމެނޭ ކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
