ކުރީގެ އުސްގެކޮޅު އިންޓްރެކްޓިވް މިއުޒިއަމަކަށް ބަދަލުކުރުމަށް ނިންމާފައިވާކަމަށް ދިވެހި ބަހާއި ސަގާފަތާއި ތަރިކައިގެ ވަޒީރު އާދަމް ނަސީރު އިބްރާހީމް ވިދާޅުވެއްޖެއެވެ.
ދިވެހި ބަހާއި ސަގާފަތާއި ތަރިކައާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވެމެއްގައި ވާހަކަފުޅު ދައްކަވަމުން ވަޒީރު ނަސީރު ވިދާޅުވީ، އުސްގެކޮޅު އިންޓްރެކްޓިވް މިއުޒިއަމް އަކަށް ބަދަލުކުރުމުގެ އިތުރުން ރަސްރަނި ބަގީޗާ އިން ރޭގަނޑު އިމާސިވް އެކްސްޕީރިއަންސް ލިބޭފަދަ ތަނަކަށް ބަދަލުކުރުމަށްވެސް ނިންމާފައިވާ ކަމަށެވެ.
މިކަމަށްޓަކައި ކުރަންޖެހޭ މަސައްކަތްތަކުގެ ތެރެއިން މިހާރު ބޭރުގެ ބައެއް ފަރާތްތަކާއި ވާހަކަދެއްކި، ކަމާ ބެހޭ ލިޔެކިޔުންތައް ފޮނުވިފައިވާ ކަމަށާއި، އެ މަސައްކަތް ހިނގަމުންދާކަމަށް ވަޒީރު ނަސީރު ވިދާޅުވިއެވެ.
"ކުރީގެ އުސްގެކޮޅު އިންޓްރެކްޓިވް މިއުޒިއަމް އަކަށް ބަދަލުކުރުން. ހަމައެއާއިއެކު، މުޅި ޕާކު، ރަސްރަނި ބަގީޗާ އިމާސިވް އެކްސްޕީރިއަންސް އަކަށް ލިބޭ ގޮތަށް ރޭގަނޑު ބަދަލުކުރުން. އެހެންވީމަ އެ މަސައްކަތް ކުރުމަށްޓަކައި އަޅުގަނޑުމެން ބޭރުގެ ބައެއް ފަރާތްތަކާއި ވާހަކަދެއްކި، ކަމާ ބެހޭ ލިޔެކިޔުންތައް ފޮނުވިފައިމިވަނީ. އެ މަސައްކަތް ހިނގަމުންއެބަދޭ."
ވަޒީރު ނަސީރު ވިދާޅުވިއެވެ.
ރާއްޖޭގައި އިންޓްރެކްޓިވް މިއުޒިއަމް ހަދާއިރު، ރާއްޖޭން އެކަމާއި ބެހޭ ފަންނީ އެހީތެރިކަމާއި އެކަމާއި ބެހޭ ޕްރޮޕޯސަލެއް ހެދުމަށްވެސް ވަރަށް ދަތިކަން ފާހަގަކުރައްވާ ވަޒީރު ނަސީރު ވިދާޅުވީ، މި މަސައްކަތް ކުރިއަށްދާނީ ކަމާއި ބެހޭ ބޭރުގެ ތަޖުރިބާކާރުންގެ އެހީތެރިކަމާއި އެކީގައި ކަމަށެވެ.
ބޭރުގެ ތަޖުރިބާކާރުންގެ އެހީއާއި އެކު މި މަސައްކަތް ކުރި ނަމަވެސް، އެކަން ކުރެވިގެންދާނީ ދިވެހިންނަށް ބޭނުންވާގޮތަށް، ދިވެހިންގެ އަސްލުވަންތަކަން އޭގައި ހިމެނޭގޮތަށްކަމަށް ވަޒީރު ނަސީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
