އެމްއެންޑީއެފް އިން އެހީ ޖަމިއްޔާގެ އަގުވަޒަން ކޮށްފިއެވެ.

މިއަދު އެހީ ޖަމިއްޔާއިން ފޭސްބުކުގައި ކުރި ޕޯސްޓެއްގައި ބުނެފައިވަނީ އެމްއެންޑީއެފް-އެފްއާރުއެސްގެ 34 ވަނަ އަހަރީ ޖަލްސާގައި، ވޭތުވެ ދިޔަ ތިން އަހަރު އެހީ ޖަމިއްޔާއިން ފޯރުކޮށްދީފައިވާ އެހީ ފާހަގަކުރައްވާ އަގު ވަޒަން ކުރުމުގެ ގޮތުން ހަދާނީ ފިލާ އަރުވާފައިވާ ކަމަށެވެ. މި ޖަލްސާގައި އެހީ ޖަމިއްޔާގެ ފަރާތުން ބައިވެރިވެލެއްވީ ޖަމިއްޔާގެ ނައިބު ރައީސް ޙަސަން ޙަބީބެވެ.

އެހީ ޖަމިއްޔާއިން ބުނީ، މި އަގުވަޒަން ކުރުމަކީ އެ ޖަމިއްޔާއަށް، އެހީ ފޯރުކޮށްދިނުމުގައި ދެމިތިބުމަށް ލިބޭ އިތުރު ހިއްވަރެއްކަމަށެވެ.

Advertisement

މީގެ އިތުރުން، ރައްޔިތުންގެ ފުރާނައާއި މުދާ ސަލާމަތް ކުރުމުގެ ޚިދުމަތް ކުރައްވާ އެމް.އެން.ޑީ.އެފް – އެފް.އާރް.އެސްގެ މަސައްކަތުގައި ބައިވެރިވުމުގެ ފުރުސަތު ދެއްވީތީ އެމް.އެން.ޑީ.އެފް – އެފް.އާރް.އެސްގެ އިސްބޭފުޅުންނަށް އެހީ ޖަމިއްޔާއިން ވަނީ ޝުކުރުދަންނަވާފައެވެ.

އެހީ ޖަމިއްޔާއަކީ ރާއްޖޭގައި ރަޖިސްޓްރީ ކުރި ފުރަތަމަ ނޮން-ޕްރޮފިޓް، ނޮން ގަވަރމަންޓަލް އިންސާނީ އެހީ ފޯރުކޮށްދޭ ޖަމިއްޔާއެވެ. 2012 ވަނަ އަހަރު އުފެއްދި މި ޖަމިއްޔާއިން ދަނީ ދިވެހިރާއްޖޭގައި އެކި ފަރާތްތަކަށް އެހީ ފޯރުކޮށްދިނުމަށް ގިނަ މަސައްކަތްކަތެއް ކުރަމުންނެވެ. އެ ޖަމިއްޔާއިން ބުނި ގޮތުގައި ޢާންމު ރައްޔިތުންގެ ލާބައާއި މަންފާއަށް ކުރެވޭ ކޮންމެ ކަމެއްގައިވެސް އެހީ ޖަމިއްޔާއާއި ޖަމިއްޔާގެ ހިތްވަރުގަދަ ޓީމް އަބަދުވެސް އެހީތެރިކަން ދޭން ތައްޔާރަށް ތިބޭނެއެވެ.