ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން ކުރިޔަށް ގެންދާ "ޖަމްޢިއްޔާތަކުގެ މަހާސިންތާ 2024" ފަށައިފިއެވެ.
މިއަދު ފެށި މި މަހާސިންތާ ކުރިޔަށް ދަނީ ގއ. ވިލިގިލީ ތައުލީމީ މަރުކަޒުގެ ހޯލުގައެވެ. މަހާސިންތާ ފެށުމުގެ ރަސްމިއްޔާތު ޝަރަފުވެރި ކޮށްދެއްވީ ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވަޒީރު އިބްރާހިމް ވަހީދުއެވެ.
60 އަށްވުރެ ގިނަ ބައިވެރިންނާއެކު ފެށި މި މަހާސިންތާ އަކީ މަދަނީ ޖަމްޢިއްޔާތައް ހިންގުމުގައި ހުރި ދަތިތަކާއި ގޮންޖެހުންތައް ދެނެގަތުމަށް ކުރިއަށް ގެންދިއުމަށް ރާވާފައިވާ މަހާސިންތާއެކެވެ.
މި މަހާސިންތާ ފެށުމުގެ ގޮތުން މިއަދު ކުރިޔަށްދިޔަ ޖަލްސާގައި ވާހަކަ ދައްކަވަމުން ވަޒީރު އިބްރާހީމް ވަޙީދު ވިދާޅުވީ މިއީ ވަރަށް މުހިންމު ފެށުމެއް ކަމަށާއި މި ފަދަ މަހާސިންތާއެއްގައި ހަގީގީ ނަތީޖާ ނެރެވޭނީ ރާއްޖޭގެ އެކި ކަންކޮޅުތަކުގައި ހަރަކާތްތެރިވާ ޖަމްއިއްޔާތަކުގެ ހިއްސާ އޮވެގެން ކަމަށެވެ.
މި މަހާސިންތާގައި ޤައުމީ ތަރައްޤީއާއި، ވަކިވަކި ރަށްރަށާއި އަތޮޅު ތެރޭގައި ހިގަމުންދާ އިޖުތިމާއީ ތަފާތު މައްސަލަތަކުން އަރައިގަތުމަށް ކުރެވޭ މަސައްކަތުގައި ޖަމްއިއްޔާތަކުގެ ދައުރާއި ގުޅޭގޮތުން ހޭލުންތެރިކަން އިތުރުކޮށް، ޖަމްޢިއްޔާތައް ގުޅިގެން މަސައްކަތްކުރުމަށް ބާރުއެޅުމަށް ވެސް ވަނީ ރާވާފައެވެ.
މި މަހާސިންތާގައި 6 ފަރާތަކުން އެ މައުލޫތަކަށް ސެޝަންތައް ނަގައިދީ ކުރިއަށް ގެންދިޔުމަށް ރޭވިފައިވާއިރު، މި މަހާސިންތާ ކުރިއަށް ގެންދަން ހަމަޖެހިފައިވަނީ ތިން ދުވަހުގެ މުއްދަތަކަށް އަންނަ ހޯމަ ދުވަހުގެ ނިޔަލަށެވެ.
Advertisement
This content is created and paid for by advertisers and does not involve Voice Journalists
