އަނެއްކާވެސް މާލޭގައި މީހަކު ރަހީނުކޮށް، ފޭރުނު މައްސަލައެއްގައި ދެ މީހަކު ހައްޔަރު ކޮށްފިއެވެ.
މީހަކު ރަހީނުކޮށްގެން ގެންގުޅެ، އެ މީހާއަށް އަނިޔާކޮށް، އޭނާގެ އަތުން ފޭރުނު މައްސަލައިގައި މިއަދު ހައްޔަރު ކޮށްފައިވަނީ ފ. ނިލަންދުއަށް ނިސްބަތްވާ 39 އަހަރުގެ އަންހެނަކާއި 40 އަހަރުގެ ފިރިހެނެކެއެވެ.
މި ދެމީހުން މިއަދު ކްރިމިނަލް ކޯޓަށް ހާޒިރުކުމުން، ކޯޓުން ވަނީ އެމީހުންގެ ބަންދަށް 10 ދުވަސް ޖަހާފައެވެ.
މި މައްސަލައާ ގުޅިގެން ފުލުހުން ހާމަކުރެއްވި ގޮތުގައި، މައްސަލައިގައި ހައްޔަރުކުރެވުނު އަންހެން މީހާ ހައްޔަރުކޮށްފައިވަނީ، ރަހީނު ކޮށްފައިހުރި މީހާ، ބަންދުކޮށްފައި ހުރި ގެއިންނެވެ. އަދި ފިރިހެން މީހާ ހައްޔަރުކޮށްފައިވަނީ އެގޭ ކައިރިންނެވެ.
އެގޭ ތެރޭގައި، ރަހީނުކުރި މީހާ ހުރި ތަނުގައި ދަނޑިބުރިތަކަކާއި، ލަކުޑި ބުރިތަކެއް ހުރި ކަމަށްވެސް ފުލުހުން މައުލޫމާތު ދިނެވެ.
މިއަދު މި މައްސަލަ ފެންމަތިވިއިރު މިދިޔަ ހުކުރު ދުވަހުވެސް ރަހީނު ކުރުމުގެ މައްސަލައެއް ފެންމަތިވިކަން ފާހަގަ ކޮށްލެވެއެވެ. ހުކުރު ދުވަހު ރަހީނުކޮށްފައި ހުއްޓާ ސަލާމަތް ކޮށްފައިވަނީ ނޭޕާލު މީހެކެވެ. އޭނާ ރަހީނުކުރީ، ފައިސާގެ މައްސަލައެއްގައި ބަންގްލަދޭޝް ދެމީހުންނެވެ.
Advertisement
This content is created and paid for by advertisers and does not involve Voice Journalists
