ފާއިތުވެ ދިޔަ 6 މަސް ދުވަހުގެ ތެރޭގައި ސަރުކާރުން މިހާތަނަށް ދަނޑުވެރިންނަށް 13 މިލިޔަން ރުފިޔާގެ ލޯނު ދޫކޮށްފައިވާކަމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ހާމަކޮށްފިއެވެ.
ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެ ވުޒާރާގެ ސްޓޭޓް މިނިސްޓަރު މަރިޔަމް ވިޝާމާ ވިދާޅުވީ، މިދިޔަ އޭޕްރީލް މަހުގެ ނިޔަލަށް 13 މިލިޔަން ރުފިޔާގެ ލޯނު ދަނޑުވެރިންނަށް ދީފައިވާއިރު، އޭގެ ތެރޭގައި އަމިއްލަ ފަރުދުންނަށް ދިން ހަތަރު މިލިއަން ރުފިޔާ، އަދި ވިޔަފާރިތަކަށް ދިން އަށް މިލިއަން ރުފިޔާގެ ލޯނު ހިމެނޭ ކަމަށެވެ.
މިއީ އެސްޑީއެފާ ގުޅިގެން "ދަނޑުވެރި ނަފާ"ގެ ނަމުގައި ކުރިޔަށް ގެންދާ ލޯނު ސްކީމަކަށްވާއިރު، ވިޝާމާ ވިދާޅުވި ގޮތުގައި މިވަގުތު ރާއްޖޭގައި 7،600 ދަނޑުވެރިން ތިބި ކަމަށާއި އޭގެތެރެއިން 55 އިންސައްތައަކީ އަންހެނުންކަމަށެވެ.
ދަނޑުވެރިކަން ކުރަން ސަރުކާރުން ދަނޑުވެރިންނަށް އެހީތެރިކަން ފޯރުކޮށްދެމުންދާކަން ފާހަގަކުރައްވައި ވިޝާމާ ވިދާޅުވީ، ހައިޑްރޯޕޯނިކްސް ފާމިން ފެށުމަށްޓަކައި އދ.އޮމަދު އާއި ފ. ދަރަނބޫދޫ ގައި އެކަމުގެ މަސައްކަތްތައް ފެށިގެން ކުރިޔަށްދާ ކަމަށެވެ.
"މިއިން ކޮންމެ ރަށެއްގެ 10 ދަނޑުވެރިންގެ ތެރެއިން ކޮންމެ ދަނޑުވެރިއަކަށް 50 ލެޓިއުސް އިންދޭ ހޮޅި ސިސްޓަމަކާއި ކިއުކަމްބާ މެލަންގެ 25 ގަސް ހެއްދޭ ވަރުގެ ޓްރަފް ސިސްޓަމެއް ފޯރުކޮށްދެވޭނެ. މިހާރު ކުރިއަށްދަނީ މި ރަށްތަކުގައި ސިސްޓަމުތައް ގާއިމްކުރުމަށް ތަކެތި ޕްރޮކިއުމެންޓް ކުރުމުގެ މަސައްކަތްތަކެއް،"
ވިޝާމާ ވިދާޅުވިއެވެ.
ވިޝާމާ އިތުރަށް ވިދާޅުވީ، އެ ދެރަށުގައި ހިންގާ ޕްރޮޖެކްޓު އަންނަ ސެޕްޓެމްބަރު މަހުގެ ނިޔަލަށް ނިމޭނެ ކަމަށް ލަފާ ކުރާކަމަށާއި، އެ ސިސްޓަމުން އެވްރެޖުކޮށް 12 ކިލޯގެ ފަތާއި، ކިއުކަމްބާ ސިސްޓަމުތަކުން 65 ކިލޯ އުފެއްދޭނެކަމަށެވެ. އަދި އިންދާ ދުވަހުން ފެށިގެން 40 ދުވަހުގެ ތެރޭގައި މާކެޓާއި ހަމަޔަށް ކިޔުކަމްބާ ނެރެވޭނެ އަދި ފަތްޕިލާވެލި ވެސް 20 ދުވަސްތެރޭގައި މާކެޓާ ހަމަޔަށް ނެރެވޭނެ ކަމަށް ވެސް ވިޝާމާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
