ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެދިވަޑައިގަތުމުގެ މަތިން ސަރުކާރު ސްކޫލްތައް އޭސީ ކުރުމުގެ މަސައްކަތް މިހަފްތާގައި ފެށުމަށް ހަމަޖެހިފައިވާ ކަމަށް ތައުލީމާއި ބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން ވަޒީރު ޝަފީއު ވިދާޅުވީ، މޫސުމީ ބަދަލުތަކާއެކު ހޫނުމިން އިހުސާސްކުރެވޭ މިންވަރު މަތިވެފައިވާއިރު، ކްލާސްރޫމެއްގައި 30 ކުދިން ތިބޭ ކަމަށާއި އެހެންކަމުން އެހޫނުމިން އިހުސާސްކުރެވޭ މިންވަރު އިތުރުވާނެކަމަށެވެ.
ދުނިޔެ ހޫނުވުމުގެ ސަބަބުން ގިނަގައުމުތަކެއްގެ ސްކޫލްތައް ވެސް ހޫނުވެ، ދަރިވަރުން ސްކޫލަށް އަންނަން ބޭނުންނުވާކަން ފާހަގަކުރައްވާ ވަޒީރު ޝަފީއު ވިދާޅުވީ، އެއީ ކުދިންގެ ކިޔެވުމަށް އަސަރުކުރާ ކަމެއް ކަމަށެވެ. އަދި މި މަޝްރޫއަށް ޚަރަދު ހިނގާނެ ނަމަވެސް ބޭނުމަކީ ކުދިންނަށް ކިޔަވައިދިނުމަށް ހިތް ފަސޭހަ މާހައުލެއް ޤާއިމް ކުރުން ކަމަށް ވެސް ވަޒީރު ވިދާޅުވިއެވެ.
ވަޒީރު ޝަފީއު ވިދާޅުވީ، މި މަޝްރޫއު ކުރިއަށް ގެންދިޔުމަށް ރައީސް ޑރ.މުޢިއްޒު އިރުޝާދުދެއްވާފައި ވަނީ އޭސީ ކުރުމުގައި އެންމެ މަދުވެގެން 30 އިންސައްތަ ކަރަންޓަކީ ސޯލާ ޕެނަލްތަކުން އުފައްދާ ކަރަންޓުގެ ގޮތުގައި ބައްޓަންކުރެވިގެން، އެފަދަ ގޮތަކަށް ވިސްނައިގެން މިޕްރޮޖެކްޓް ކުރިއަށް ގެންދިއުމަށް ކަމަށެވެ.
"މިއީ ރާއްޖެއަށް އެކަނި ދިމާވެފަވާ ކްރައިސިސްއެއް ނޫން. ވަރަށް ގިނަ ގައުމުތަކުން ފާހަގަކުރި ސްކޫލުތަކުގަ ހޫނުގަދަވުމުގެ ސަބަބުން ކުދިން ސްކޫލަށް ނުދިއުމުގެ ސަބަބުން އަންނަ ލާނިން ލޮސް. އޭސީ ކުރުމުގައި އެންމެ މަދުވެގެން 30 އިންސައްތަ ކަރަންޓަކީ ސޯލާ ޕެނަލްތަކުން އުފައްދާ ކަރަންޓުގެ ގޮތުގައި ބައްޓަންކުރެވިގެން، އެފަދަ ގޮތަކަށް ވިސްނައިގެން މިޕްރޮޖެކްޓް ކުރިއަށް ގެންދިއުމަށް ރައީސް އިރުޝާދުދެއްވާފައިވަނީ. އަޅުގަނޑުމެން އޭސީ ކުރުމުގެ ޕްރޮޖެކްޓުގެ މަސައްކަތް މިހަފްތާ ތެރޭގައި އިފްތިތާހުކުރާނަން"
ވަޒީރު ޝަފީއު ވިދާޅުވިއެވެ.
ސަރުކާރުގެ ހުރިހާ ސްކޫލްތައް އޭސީ ކުރުމަށް ކުރިއަށްގެންދާ މަޝްރޫއުގެ މަސައްކަތް 2026 ވަނަ އަހަރުގެ ދިރާސީ އަހަރުގެ ކިޔެވުން ފެށެންވާއިރަށް ނިންމާލެވޭނެކަމަށް މީގެ ކުރިން ވަޒީރު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
