ޕަޕުއާ ނިއު ގިނީގެ އުތުރުގައި އޮންނަ އެންގާ ޕްރޮވިންސްގެ ކައޯކަލަމް އަވަށުގެ ބިންގަޑު ކަނޑައިގެން ގޮސް އެތައް ބަޔަކު މަރުވެ ދިޔަ ހާދިސާއާއި ގުޅިގެން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެ ގައުމުގެ ބޮޑުވަޒީރު ޖޭމްސް މަރަޕޭ އަށް ތައުޒިޔާގެ މެސެޖެއް ފޮނުއްވައިފިއެވެ.

ރައީސް ޑރ.މުޢިއްޒުގެ މި ތައުޒިޔާގެ މެސެޖްގައި އެމަނިކުފާނު ވިދާޅުވީ، މިދިޔަ ހުކުރު ދުވަހު ހިނގާދިޔަ މި ހާދިސާގައި އެތައް ބަޔަކު މަރުވި ވާހަކަ އަޑުއެއްސެވީ ފުން ހިތާމަ އާއި އެކުގައި ކަމަށާއި، މި ހާދިސާގައި އެތައް ބަޔަކު މަރުވެ، މުދަލާއި ގެދޮރު ގެއްލިގެން ދިޔުމަކީ ތަޞައްވުރުވެސް ނުކުރެވޭ ފަދަ ހިތާމައެއް ކަަމަށެވެ.

ހަމައެއާއިއެކު، ރައީސް ޑރ.މުޢިއްޒު ވަނީ ދިވެހި ސަރުކާރާއި ރާއްޖޭގެ އެންމެހާ ރައްޔިތުންގެ ނަމުގައި ތައުޒިޔާ ވިދާޅުވެފައެވެ. އަދި މި ހިތާމަވެރި ވަގުތުގައި ރާއްޖޭގެ ރައްޔިތުން ތިބީ  ރާއްޖެ އެކޭ އެއްފަދައިން ސްމޯލް އައިލެންޑް ޑިވެލޮޕްމަންޓް ސްޓޭޓްސް (ސިޑްސް) ހިމެނޭ ޕަޕުއާ ނިއު ގިނީ އާއި އެކުކަމަށް ވެސް އެމަނިކުފާނު ވިދާޅުވިއެވެ.

ރައީސް ޑރ.މުޢިއްޒުގެ ތައުޒިޔާގެ މެސެޖް ނިންމަވާލައްވަމުން އެމަނިކުފާނު ވަނީ އެ ސައިޓުގައި ސަރޗް އެންޑް ރެސްކިއު މަސައްކަތްތައް އަވަހަށް އަދި ކާމިޔާބުކަމާއެކު ކުރިއަށް ގެންދެވޭނެކަމަށް އުންމީދުކުރައްވާ ކަމަށާއި، އަދި އެ ކާރިސާގެ ސަބަބުން ގެއްލުން ލިބުނު އެންމެން ވީހާވެސް އަވަހަށް ރަނގަޅުވުމަށް އުންމީދުކުރައްވާކަމަށް ވިދާޅުވެފައެވެ.

 3،000 އަށް ވުރެ ގިނަ މީހުން ބޯހިޔާވަހިކަން ހޯދަމުން އައި ކައޯކަލަމް އަވަށުގެ ބިންގަޑު ކަނޑައިގެން ގޮސް 2000 އަށް ވުރެ ގިނަ މީހުން ވަނީ ބިންގަނޑުގެ އަޑީގައި ވަޅުލެވިފައެވެ.

މި ސަރަހައްދުން މީހުން ހޯދުމުގެ މަސައްކަތް މެދުކެނޑުމެއްނެތި ކުރިއަށް ދާއިރު، ބިންގަނޑު ކަނޑައިގެން ދިޔުމުގެ ސަބަބުން އެ ސަރަހައްދަށް އެއްގަމު މަގުން ދަތުރުކުރުން ބަންދުވެފައިވާތީ، އެ ސަރަހައްދާއި ހިސާބަށް ހަމައެކަނީ ދެވެނީ ހެލިކޮޕްޓަރުގެ ޒަރީއާއިންނެވެ.