ހުޅުމާލޭ ޖަލުގައި ޙުކުމް ތަންފީޒު ކުރަމުން ދިޔަ މީހަކު މަރުވެއްޖެއެވެ.

މޯލްޑިވްސް ކަރެކްޝަނަލް ސާވިސް އިން މިއަދު ހާމަކުރެއްވި ގޮތުގައި، މަރުވެފައި ވަނީ ޢުމުރުން 83 އަހަރުގެ ތ. ތިމަރަފުށީ / މިނިވަން އައްސޭރި އާދަމް އަލި މަނިކު ނަމަކަށް ކިޔާ މީހެކެވެ.

އާދަމް އަލި މަނިކު ނުހޭލައިގެން، އެ ގޮޅީގައި ތިބި އެހެން ގައިދީން ޑިއުޓީ އޮފިސަރުންނަށް ވަނީ އަންގާފައެވެ. އަދި މެޑިކަލް ސެންޓަރަށް ގެންދިޔައިރުވެސް ހަރަކާތް ނުކުރާތީ، އޭނާ ވަނީ 12:00 ހާއިރު އެމަޖެންސީ ޙާލަތުގައި ހުޅުމާލޭ ހޮސްޕިޓަލަށް ގެންގޮސް ފަރުވާ ދޭން ފަށާފައެވެ.

ފަރުވާ ދިނުމަށްފަހުވެސް ހަރަކާތެއް ނެތުމުން، އޭނާ މަރުވެފައިވާކަމަށް ކަނޑައަޅާފައިވަނީ މެންދުރު 12:30 ހާއިރު ކަމަށް ކަރެކްޝަނަލް ސަރވިސް އިން މައުލޫމާތު ދެއެވެ.

އާދަމް އަލި މަނިކު ތަންފީޒުކުރަމުން ދިޔައީ ކުޑަ ކުއްޖަކާ ގުޅޭ ބަދުއަޚްލާޤީ މައްސަލައެއްގައި 10 އަހަރު ދުވަހުގެ ޙުކުމެކެވެ. ކަރެކްޝަންސް އިން މައުލޫމާތު ދިން ގޮތުގައި އޭނާއަކީ ހަކުރު ބަލި، ކިޑްނީ އަދި ކުޑަކަމުދާ ނިޒާމުގެ ބަލި، ކޮލެސްޓްރޯލް، ހައިޕަރޓެންޝަން އަދި ލޮލުގެ ބަލި ފަދަ ގިނަ ބަލިތަކަށް ބޭސްކުރަމުން އައި މީހެކެވެ.