ޕަބްލިކް ސަރވިސް މީޑިޔާ (ޕީއެސްއެމް) އާ ހަވާލުވިއިރު ކުންފުނީގެ ދަރަނި 261 މިއަލަން ރުފިޔާއަށް އަރާ ކަމަށް އެ ކުންފުނީގެ މެނޭޖިންގ ޑިރެކްޓަރ ޒީނާ ޒާހިރު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ޒީނާ ވިދާޅުވީ، މިދިޔަ އަހަރުގެ ނޮވެމްބަރު މަހުގެ 28 ގައި، އޭނާ މަޤާމާ ހަވާލުވީއިރު، ކޯޓުގައި ހިނގަމުންދާ ކޭސްތައް ނުހިމަނާ ކުންފުނީގެ ދަރަނި އޮތީ 261 މިލިއަން ރުފިޔާގައިކަމަށެވެ.

މި ބޮޑު ދަރަނީގެ ތަފްސީލު ދެއްވަމުން ޒީނާ ވިދާޅުވީ، ދައުލަތުގެ އިދާރާތަކާއި ސަރުކާރުގެ ހިއްސާވާ ކުންފުނިތަކަށް ދައްކަން ޖެހޭ ދަރަނި 122 މިލިއަން ރުފިޔާއަށް އަރާއިރު އަމިއްލަ ކުންފުނިތަކާއި އަމިއްލަ ފަރާތްތަކަށް 26 މިލިއަނަަށްވުރެ ގިނަ ރުފިޔާގެ ދަރަނި ދައްކަން ޖެހޭ ކަމަށެވެ. އަދި ބޭރުގެ އެކި ކުންފުނިތަކަށް ދައްކަން ޖެހޭ ދަރަނި 24 މިލިއަން ރުފިޔާއަށް ވުރެ މައްޗަށް އަަރާ ކަަމަށްވެސް ޒީނާ ވިދާޅުވިއެވެ.

މީގެ އިތުރުން ޒީނާ ހާމަކުރެއްވި ގޮތުގައި، ޕީއެސްއެމްއިން، ވޭތުވެ ދުޔަ އަހަރުތަކުގައި ނަގާފައިވާ ލޯނުތަކުގެ ތެރެއިން 87 މިލިއަން ރުފިޔާ ނުދެއްކި އެބަހުއްޓެވެ. އަދި މި ލޯނަށްވެސް އިންޓްރެސްޓް އަރަމުންދާކަން ޒީނާ ކަންބޮޑުވުމާއެކު ފާހަގަކުރެއްވިއެވެ.

ޕީއެސްއެމްއިން ދައްކަންޖެހޭ ދަރަންޏަށް އަވަސް ހައްލެއް ހޯދުމަށް ސަރުކާރާއި މަޝްވަރާކޮށްގެން، ސަރުކާރުގެ އެހީތެރިކަމާއި އެކު، މަސައްކަތް ކުރަމުންދާ ކަން ފާހަގަކުރައްވާ، ޒީނާ ވިދާޅުވީ ޕީއެސްއެމްގެ އާ މެނޭޖްމެންޓް ހަވާލުވެގެން ދަރަނީގެ ގޮތުގައި 9 މިލިއަން ރުފިޔާ ދައްކާ ޚަލާސްކޮށްފައިވާކަމަށެވެ.

މީގެ އިތުރުން، އެ ކުންފުނިން ހޯދަމުންދާ ޚިދުމަތްތަކަށް ފައިސާ ދެއްކުމުގެ ކަންކަން މިހާރު ދުވަހުން ދުވަހަަށް ކުރެވެމުންދާކަން ވެސް ޒީނާ ފާހަގަކުރެއްވިއެވެ.

މި މައްސަލަތަކާއި ގުޅިގެން ޕީއެސްއެމް އިން ފުލުހަށް މައްސަލަ ހުށަހަޅާފައިވާއިރު، އެ ކުންފުނީގެ ފައިނޭންސް ހެޑް ވަނީ ސަސްޕެންޑުކޮށް އަދި މިހާރު ވަޒީފާއިން ވަކި ކޮށްފައެވެ.