ދައުލައުގެ މީޑިޔާ، ޕީއެސްއެމްގައި، 4 މިލިއަން ރުފިޔާގެ ޚިޔާނާތުގެ މައްސަލައެއް ފެންމަތިވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި، ޕީއެސްއެމްގެ މެނޭޖިން ޑިރެކްޓަރ، ޒީނާ ޒާހިރު ވިދާޅުވީ، 2020 ވަނަ އަހަރުން ފެށިގެން، ކުންފުނީގެ ބަޖެޓުން އަމިއްލަ ފަރާތަކާ މެދު ޝައްކުއުފެދޭ ފަދަ މުޢާމަލާތްތަކެއް ހިންގާފައިވާކަމަށެވެ. 

އެގޮތުން، ޑޮލަރު ގަތުމުގެ ނަމުގައި، އަމިއްލަ ފަރާތަކަށް ގިނަ ޢަދަދެއްގެ ފައިސާ ފޮނުވާފައިވާކަން ޒީނާ ހާމަކުރެއްވިއެވެ.

މި ބޮޑު ޚިޔާނާތުގެ މައްސަލައިގައި ތުހުމަތު ކުރެވެނީ ޕީއެސްއެމްގެ ކުރީގެ ފައިނޭންސް ހެޑްގެ މަގާމުގައި ހުންނެވި ފަރާތަށެވެ. އެހެންކަމުން، ކުރީގެ ފައިނޭންސްގެ ހެޑް ސަސްޕެންޑްކޮށް މައްސަލަ ތަޙްޤީގު ކުރުމަށްފަހު މި މަހުގެ 19 ވަނަ ދުވަހު އޭނާ ވަޒީފާއިން ވަކިކޮށްފައިވާ ކަމަށްވެސް މިއަދު ބޭއްވި ނޫސްވެރިންގެ ބައްދަލުވުމުގައި ޒީނާ ވިދާޅުވިއެވެ.

ޒީނާ އިތުރަށް ވިދާޅުވީ، ސަރުކާރުގެ ކަމާ ގުޅުން ހުރި މުއައްްސަސާތަކަށް މިކަން ހިއްސާ ކޮށްފައިފައިވާނެ ކަމަށެވެ. އަދި މި މައްސަލައާ ގުޅިގެން، ޖިނާއީ ތަޙްޤީގެއް ހިންގުމަށް އެދި ފުލުހުންނަށް ހުށަހަޅައިގެން އެ މައްސަލަ ފުލުހުންވެސް ބަލަމުންދާ ކަަމަށް ޒީނާ ވިދާޅުވިއެވެ.

މީގެ އިތުރުން، މި މައްސަލަ އިތުރަށް ބެލުމަށް 2017 ވަނަ އަހަރުން ފެށިގެން މި މަހާ ހަމައަށް ކުންފުނީގެ ޚާއްސަ އޮޑިޓެއް ކުރިއަށް ގެންދިއުމަށް އޮޑިޓް އޮފީހުގައި މިދިޔަ މަހު ސިޓީއަކުން އެދިފައިވާނެ ކަމަށްވެސް ޒީނާ ވިދާޅުވުވިއެވެ.

މިއަދު ބޭއްވި ނޫސްބެރިންގެ ބައްދަލުވުމުގައި، މިދިޔަ އަހަރުގެ ނޮވެމްބަރު މަހު ޕީއެސްއެމްގެ މެނޭޖިން ޑިރެކްޓަރުކަމާ ހަވާލުވި ޒީނާ ވަނީ، ކުންފުނީގެ މާލީ ޙާލަތާމެދު ކަންބޮޑުވާ ފަދަ ގިނަ ކަންތައްތަކެއް ހިއްސާ ކުރައްވާފައެވެ. 

އެގޮތުން ޒީނާ މަގާމާއި ހަވާލުއިިރު އެ ކުންފުނީގެ ތިޖުރީގައި އެންމެ ފައިސާއެއްވެސް ނެތް ކަމަށް ޒީނާ ވިދާޅުވިއިރު، ކުންފުނީގެ ދަރަނި 261 މިލިއަނަށް އަރާކަން ފާހަގަކޮށްލެވެއެވެ.

ޒީނާ ވަނީ، މި މައްސަލައާ ގުޅިގެން، އުސޫލުގެ ތެރެއިން ފިޔަވަޅު އަޅަން ޖެހޭ މީހަކަށް ފިޔަވަޅު އަޅާނެ ކަމަށާއި، ކުރަން ޖެހޭ ކޮންމެ ކަމެއްވެސް ޤާނޫނާއި ޤަވާއިދުގެ ތެެރެއިން ކުރަމުންދާނެ ކަމަށް ވަޢުދުވެވަޑައިގެންފައެވެ.