އީރާނުން ޔަމަނުގެ ހޫތީންނަށް ބާރުގަދަ މިސައިލް ތަކެއް ފޯރުކޮށްދީފިއެވެ.
އީރާނުން ހޫތީންނަށް ފޯރުކޮށްދީފައިވަނީ ކަނޑުމަގުން ވެސް ފޮނުވާލެވޭ ބުލެސްޓިކް މިސައިލެއް ކަމަށްވާ ޤަދަރުއެވެ. އީރާނުގެ ތަސްނީމް ނޫހުން ރިޕޯޓްކުރާ ގޮތުގައި މިއީ އެމެރިކާ އާއި އިސްރާއީލުގެ އަސްކަރިއްޔާ އަށް ބޮޑެތި ގޮންޖެހުންތަކެއް ކުރިމަތިލާން ޖެހިފައިވާ ހަތިޔާރެކެވެ.
2007 ވަނަ އަހަރު އީރާނުން އުފެއްދި މި މިސައިލަކީ 1,600 އާއި 1,950 ކިލޯމީޓަރާއި ދެމެދުގެ ރާސްތާއަކަށް ބާރު ދުވެލީގައި ދަތުރުކުރާ މިސައިލްތަކެކެވެ.
އީރާނަކީ އެ ސަރަހައްދުގައި އެންމެ ގިނަ އަދަދަކަށް ބުލެސްޓިކް މިސައިލާއި އަސްކަރީ ޑްރޯން އުފައްދާ ގައުމަށް ވާއިރު، އީރާނުން ހޫތީނަށް މިސައިލްތައް ފޯރުކޮށްދިނުމަކީ ޔަހޫދީންނާއި އެމީހުންނަށް ވާގިވެރިވާ ގައުމުތަކަށް ބޮޑެތި ގޮންޖެހުންތަކަކާއި ނުތަނަވަސްކަމެއް ގެންނާނެ ކަމެއް ކަމަށް ކަމާބެހޭ ފަރާތްތަކުން އަންނަނީ ބުނަމުންނެވެ.
އީރާނުން ހޫތީންނަށް ތާއީދުކުރާކަން މީގެ ކުރިން ހާމަކުރި ނަމަވެސް، ހަތިޔާރު ފޯރުކޮށްދޭކަމުގެ ތުހުމަތުތައް އަންނަނީ ދޮގުކުރަމުންނެވެ. އެގައުމުން މިފަދައިން ބުނި ނަމަވެސް އީރާނާއި ހޫތީންގެ ދެމެދުގައި ހަތިޔާރު ބަދަލުކުރަމުން އަންނަކަން ފާހަގަކޮށްލަންޖެހެއެވެ.
ހޫތީން އަންނަނީ ޔަހޫދީން ޣައްޒާ އަށް ދެމުންގެންދާ ލާއިންސާނީ ހަމަލާތަކާއި ގުޅިގެން، ފަލަސްތީނަށް އޮތް ތާއީދު ދެއްކުމުގެ ގޮތުން، ރަސްކަނޑު ހުރަސްކޮށް ދަތުރުކުރާ ޔަހޫދީންގެ އުޅަނދުތަކާއި އެގައުމާއި ގުޅުންހުރި އުޅަނދުތަކަށް ހަމަލާދެމުންނެވެ.
Advertisement
This content is created and paid for by advertisers and does not involve Voice Journalists
