ތިލަމާލެ ބުރިޖްގެ 38.8 އިންސައްތަ މަސައްކަތް ނިމިފައިވާކަމަށް އިމާރާތްކުރުމާއި ބިނާރާބެހޭ ވަޒީރު ޑރ.ޢަބްދުﷲ މުއްޠަލިބު ހާމަކުރައްވައިފިއެވެ.
އިމާރާތްކުރުމާއި ބިނާރާބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ވަޒީރު މުއްޠަލިބު ވަނީ ބްރިޖްގެ މަސައްކަތް މިހާތަނަށް ގޮސްފައިވާ މިންވަރު ތަފްސީލުކޮށް ހާމަކޮށްދެއްވާފައެވެ.
އެގޮތުން ވަޒީރު ވިދާޅުވީ ވިލިމާލެ ބްރިޖްގެ މަޝްރޫޢުގެ ދަށުން ޖެހުމަށް ހަމަޖެހިފައިވާ ތަބުތަކުގެ ޕައިލިންގެ %65 މަސައްކަތް ނިމިފައިވާކަމަށާއި ޕައިލް ކެޕްގެ %46 މަސައްކަތް ނިމިފައިވާކަމަށެވެ. އަދި ޕިއާ ކޮލަމްގެ %48 މަސައްކަތް ނިމި، މަޝްރޫޢުތަކުގެ ޑެކްގެ ބޭނުންވާ ޕްރިކާސްޓުތަކުގެ %31 ކާސްޓުކޮށްފައިވާއިރު، ވިލިމާލެ ސެގްމަންޓުތައް ހުޅުވާލުމުގެ މަސައްކަތް ފެށިފައިވާކަމަށް ވަޒީރު މުއްޠަލިބު ވިދާޅުވިއެވެ.
"ގްރޭޓާ މާލެ ކަނެކްޓިވިޓީ މާލެ-ތިލަމާލެ ލިންކް ގެ މަސައްކަތުގެ 38.8 އިންސައްތަ ވަނީ ނިމިފައި. މަޝްރޫޢުތަކުގެ ދަށުން ޖެހުމަށް ހަމަޖެހިފައިވާ ތަބުތަކުގެ ޕައިލިންގެ %65 މަސައްކަތް ނިމިފައި. ޕައިލް ކެޕްގެ %46 މަސައްކަތް ނިމިފައި. ޕިއާ ކޮލަމްގެ %48 މަސައްކަތް ނިމިފައި. މަޝްރޫޢުތަކުގެ ޑެކްގެ ބޭނުންވާ ޕްރިކާސްޓުތަކުގެ %31 ވަނީ ކާސްޓުކޮށް ނިމިފައި އަދި ވިލިމާލެ ސެގްމަންޓުތައް ލޯންޗް ކުރުމުގެ މާނައަކީ ހުޅުވާލުމުގެ މަސައްކަތް ވަނީ ފެށިފައި."
ވަޒީރު މުއްޠަލިބް ވިދާޅުވިއެވެ.
ހަމައެއާއިއެކު، ބްރިޖްގެ ސެގްމަންޓް ތަކުގެ ތެރެއިން މާލެއިން ގުޅިފަޅަށް މަސައްކަތްތައް ނިންމުމަށް ތާވަލުކޮށްފައިވަނީ 31 މަރޗް 2026 އަށެވެ. އަދި ގުޅިފަޅުން ތިލަފުއްޓަށް ގުޅާލާ ބްރިޖްގެ މަސައްކަތް 30 ސެޕްޓެމްބަރު 2026 އަށް ނިންމުމަށް ތާވަލުކޮށްފައިވާއިރު، މުޅި މަޝްރޫޢު 30 ސެޕްޓެމްބަރު 2026 ނިމޭނެކަމަށް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
