ހަ މަސްދުވަހުގެ ތެރޭގައި 30 މިލިއަން ރުފިޔާގައި ހުރި ސޮވެރިން ފަންޑު 700 މިލިއަން ރުފިޔާއަށް އިތުރުކޮށްފިއެވެ. 

ވޭތުވެ ދިޔަ ހަ މަސްދުވަހު ކުރެވުނު މަސައްކަތްތަކާ ގުޅޭ ގޮތުން މައުލޫމާތު ހިއްސާ ކުރުމަށް މިއަދު މާލީ ވުޒާރާއިން ބޭއްވި ނޫސްވެރިންގެ ބައްދަލުވުމުގައި، މާލީ ވަޒީރު ޑރ. މުޙައްމަދު ޝަފީޤް ވިދާޅުވީ ސޮވެރިން ފަންޑު 2 މިލިއަން ޑޮލަރުން 50 މިލިއަން ޑޮލަރަށް އިތުރުކުރެވިފައިވާކަމަށެވެ. 50 މިލިއަން ޑޮލަރަކީ ދިވެހި ރުފިޔާއިން އަގު ކުރާނަމަ، 700 މިލިއަން ރުފިޔާއެވެ.

އަހަރުގެ މިހާތަނަށް ސޮވެރިން ފަންޑަށް 50 މިލިއަން ޑޮލަރު ޖަމާކުރެވުނު އިރު، ސަރުކާރުގެ އަމާޒަކީ މި އަހަރު ނިމުމުގެ ކުރިން މި ފަންޑަށް 100 މިލިއަން ޑޮލަރު ޖަމާކުރުން ކަމަށް ވަޒީރު ވިދާޅުވިއެވެ.

Advertisement

ސޮވެރިން ފަންޑަކީ ތަރައްޤީގެ މަޝްރޫއުތަކަށް އިންވެސްޓްކުރަން ސަރުކާރުން ނަގާ ލޯނުތަކުގެ ބުރަ ފަހުގެ ޖީލުތަކަށް އުފުލަން ނުޖެހޭނެހެން، ފަހަށް ފައިސާ ރައްކާކުރުމަށް އެކުލަވާލާފައިވާ ފަންޑެކެވެ.

ނޫސްވެރިންގެ ބައްދަލުވުމުގައި ވަޒީރު ވިދާޅުވީ ރައީސް ޑރ.މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވިއިރު ރާއްޖޭގެ އިޤްތިޞާދާއި މާލީ ޙާލަތު އޮތީ ވަރަށް ދަށުގައި ކަމަށެވެ. ނަމަވެސް ސަރުކާރުން، ހަ މަސް ދުވަހުގެ ތެރޭގައި ގިނަ މަސައްކަތްތަކެއް ކޮށް ބޮޑެތި ކުރިއެރުންތަކެއް ހޯދިފައިވާ ކަމަށްވެސް ވަޒީރު ވިދާޅުވިއެވެ.