މާލެ ސިޓީގެ މިސްކިތްތަކުގެ ފާހަނާތަކަކީ ފަސްތަރީގެ ފާހަނާތަކަކަށް ހެދުމަކީ އަމާޒެއްކަމަށް މާލެ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވެއްޖެއެވެ.
މިސްކިތްތަކާއި ވެށީގެ ސާފްތާހިރުކަމާއި ގުޅޭގޮތުން ބޭއްވި ބައްދަލުވުމުގައި ވާހަކަފުޅު ދައްކަވަމުން އާޒިމް ވިދާޅުވީ، މާލެ ސިޓީގެ މިސްކިތްތަކުގެ ފާހަނާތައް ފަސްތަރީގެ ފާހަނަތަކަށް ބަދަލު ކުރަން ނިންމާފައިވާ ކަމަށާއި، ކުރިއަށް އޮތް 2 އަހަރެއްހާ ދުވަހުގެ ތެރޭގައި މި މަސައްކަތް ނިމޭއިރު، ހުންނާނީ 5 ތަރީގެ ރީތި ފާހާނާތަކެއް ކަމަށެވެ.
"މިސްކިތްތަކަކީ ވަރަށް ވަރަށް ރީތި ތަންތަނޭ މީހުން ބުނާ ވަރަށް އެކަން ކޮށްދެއްވާށޭ..އަޅުުގަނޑުގެ އަމާޒެއް މިސްކިތުގެ ފާހާނާ ތަަކަކީ ފަސް ތަރީގެ ފާހަނަތަކަށް ހެދުން..އެކަމުގެ މަސައްކަތް ފަށައިގެން މި ދަނީ.. އިރާދަކުރެއްވިއްޔާ އަޅުގަނޑުމެން މާލެ، ވިލިމާލެ، ހުޅުމާލޭގައި ހުންނާނީ ކުރިއަށް އޮތް ދެ އަހަރު ތެރޭ ފަސް ތަރީގެ ރީތި ފާހަނަ،"
މޭޔަރު އާޒިމް ވިދާޅުވިއެވެ.
މީހެއްގެ ގެއަކަށް ވަދެފައި، ފާހަނައަށް ވަދެވުމުން ފާހަނަ ރީތިވެއްޖެނަމަ އުފާވާކަން ފާހަގަކުރައްވަމުން އާޒިމް ވިދާޅުވީ، މިސްކިތްތަކުގެ ފާހަނަތައްވެސް ރީތިވުމުން އެކަމުގެ ހިތްހަމަޖެހުން ލިބިގެންދާނެ ކަމަށެވެ. އަދި މިސްކިތެއްގެ ފާހާނާއަކަށް ވަނުމަށްފަހު އެ ތަނުގައި ހުރި ނަޖިހާ އެއްކޮށް މިސްކިތަށް އެރިއްޖެނަމަ އެއީ ވަރަށް ދެރަ ކަމެއް ކަމަށާއި، މިސްކިތްތަކުގެ ފާހާނާތައް ސާފުކޮށް ބެލެހެއްޓުމުގައި ގޮންޖެހުންތަކެއް ހުރި ނަމަވެސް އެއީ ކުރެވޭނެ ކަމެއްކަމަށެވެ.
ހަމައެއާއިއެކު، އިސްލާމީ ކަންތައްތަކާއި ބެހޭ ވަޒީރު ޑރ.މުހައްމަދު ޝަހީމް އަލީ ސައީދު ގެ ލަފާފުޅާއި އެއްގޮތަށް މިސްކިތްތައް ސާފުކުރަން ފަށާފައިވާ ކަމަށާއި، އެ މަސައްކަތުގައި ދިވެހި މުވައްޒަފުން ވެސް ޝާމިލުވާ ކަމަށް އާޒިމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
