ދިވެހި ރާއްޖެއަށް ދާއިމީ ގޮތެއްގައި ބޭރުގެ އަސްކަރީ ހާޒިރީއެއް ބޭނުންނުވާކަމަށާއި އަދި ބޭނުން ނުވެސްވާނެ ކަމަށް ދިފާއީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

 ސިންގަޕޫރުގެ އިންޓަނޭޝަނަލް އިންސްޓިއުޓް ފޯ ސްޓްރެޓެޖިކް ސްޓަޑީސްގެ ފަރާތުން ބޭއްވި "ޝަންގްރިލާ ޑައިލޮގް 2024"ގައި ވާހަކަފުޅު ދައްކަވަމުން ވަޒީރު ޣައްސާން ވިދާޅުވީ، ގައުމުތަކާއެކު ރާއްޖެއިން ދިފާއީ ގުޅުން ގާއިމްކުރިނަމަވެސް އެއްވެސް ގައުމެއްގެ ސިފައިން ދާއިމީކޮށް ގާއިމްވެ ތިބުމަށް ސަރުކާރުން ބޭނުންނުވާ ކަމަށެވެ.

 ރާއްޖޭގެ ސުލްހައާއި، ހަމަޖެހުމާއި، ސަލާމަތާއި، ރައްކާތެރިކަން ގާއިމްކުރުމުގެ ގޮތުން ރައީސް ޑރ.މުޙައްމަދު މުޢިއްޒު އެންމެ އިސްކަން ދެއްވަނީ ދިވެހިރާއްޖޭގެ އަމިއްލަ ދިފާއީ ބާރުތަކުގެ ކެޕޭސިޓީ އިތުރުކޮށް، ދުނިޔެ ގަބޫލުކުރާ މިންގަނޑުތައް ރާއްޖޭގެ ސަރަހައްދުގައި ކަށަވަރުކުރުންކަން ފާހަގަކުރައްވާ ވަޒީރު ވިދާޅުވީ، އޭގެ ތެރެއިން ގުޅުންތައް ދެމެހެއްޓުމުގެ އިތުރުން ގުޅުން ގާއިމްކުރެއްވުމަށްވެސް ރައީސް ޑރ.މުޢިއްޒު އިސްކަން ދެއްވާކަމަށެވެ.

ހަމައެއާއިއެކު، ރާއްޖޭގެ އަސްކަރިއްޔާގެ  ފެންވަރު ރަނގަޅު ކޮށް، ކަނޑުގެ ޓެރަރިޒަމް އަމަލުތަކާއި، ނަހަމަގޮތުގައި ގާނޫނީ ވަޞީލަތްތައް ބޭނުންކުރުމާއި، މޫސުމީ ބަދަލުތަކުގެ ސަބަބުން ކުރިމަތިވެދާނެ ނުރައްކާތެރިކަމަކުން ސަލާމަތްވެ، ރައްކާތެރިވުމުގެ ގާބިލުކަން އިތުރުކުރެއްވުމަށް ވެސް ރައީސް ޑރ.މުޢިއްޒު އިސްކަން ދެއްވާކަމަށް ވަޒީރު ވިދާޅުވިއެވެ.

ކުދި ޤައުމުތަކުގެ ސަލާމަތާއި ރައްކާތެރިކަން ކަށަވަރުކުރުމަކީ އަބަދުވެސް ގޮންޖެހުމެއް ކަމަށާއި، ރާއްޖެފަދަ ކުދި ޤައުމުތަކުން، މިނިވަންކަމުގެ އެންމެ ބޮޑު ޔަގީންކަމެއްގެ ގޮތުގައި ބައިނަލްއަގުވާމީ ގާނޫނަށް ބަލާފައިވާއިރު، ބައެއް ގައުމުތަކުން އެ އަގު ކުރުންތައް ދޫކޮށްލުމަކީ އޭގެ ސަބަބުން ކުދި ގައުމުތަކަށް ކުރިމަތިވާ ދަތިކަމެއް ކަމަށް ވަޒީރު ޣައްސާން ވިދާޅުވިއެވެ.

ވަޒީރު ޣައްސާން އިތުރަށް ވިދާޅުވީ، ދިފާޢީ ޤާބިލުކަން އިތުރުކޮށް ރާއްޖޭގެ ވަށައިގެންވާ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމަކީ ރައީސް ޑރ.މުޢިއްޒުގެ ސިޔާސަތުގައި އިސްކަންދޭ ކަމަކަށް ވާއިރު، އެއްވެސް މާނައެއްގައި ދިވެހި ބިމުގައި ބޭރުގެ ސިފައިން ޤާއިމްވެ ތިބުމަށް ދިވެހި ސަރުކާރުން ބޭނުން ނުވާކަމަށެވެ.