މިއަހަރުގެ ކަނޑުތަކުގެ ދުވަސް ފާހަގަކުރުމުގެ ގޮތުން ބާއްވާ މަސްރޭހުގައި ސަރުކާރުގެ ކެބިނެޓްގައި ހިމެނޭ މިނިސްޓަރުންގެ ޓީމެއް ވެސް ބައިވެރިވެލައްވާނެކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ހާމަކޮށްފިއެވެ. ކަނޑުތަކުގެ ދުވަސް ފާހަގަ ކުރަން ރާވާފައިވާ ކަންތައްތަކާ ގުޅޭ ގޮތުން މައުލޫމާތު ހިއްސާކުރުމަށް އެ ވުޒާރާއިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ސްޓޭޓް މިނިސްޓަރު، މުހައްމަދު މުއްތަލިބު ވިދާޅުވީ، މިއަހަރު ކަނޑުގެ ދުވަސް ފާހަގަކުރަނީ ވަރަށް ކުލަގަދަކޮށް ކަމަށެވެ.

މި ދުވަހާއި ގުޅިގެން ކުރިއަށް ގެންދާ ހަރަކާތްތަކަކީ ސަރުކާރުން ވަރަށް ބޮޑަށް އިސްކަންދޭ ހަރަކާތްތަކެއް ކަމަށާއި، ކެބިނެޓްގެ މިނިސްޓަރުންގެ ޓީމެއް ބައިވެރިވެލެއްވުމަކީ އެކަން ހާމަވެގެންދާ ކަމެއް ކަން މުއްތަލިބު ވިދާޅުވިއެވެ.

ކަނޑުތަކުގެ ދުވަހަކީ މި މަހުގެ އަށް ވަނަ ދުވަސް ނަމަވެސް މިއަދުން ފެށިގެން ދުވަހާއި ގުޅޭ ހަރަކާތްތައް މަސްވެރިކަމާއި ބެހޭ ވުޒާރާއިން ވަނީ ފަށާފައެވެ. 

ކަނޑުތަކާއި ގުޅިގެން އެތައް ހަރަކާތްތަކެއް ކުރިއަށް ގެންދަން ހަމަޖެހިފައިވާއިރު، މުއްތަލިބް ފާހަގަކުރެއްވި ގޮތުގައި އެންމެ ފުރަތަމަ ކުރިއަށް ގެންދިޔުމަށް ހަމަޖެހިފައިވަނީ މުޅި ރާއްޖެއިން 7 އަހަރާއި 13 އަހަރާއި ދެމެދުގެ އުމުރުފުރާ އަށް ހުޅުވާލައިގެން ކުރިއަށްގެންދާ ކުރެހުމުގެ މުބާރާތެކެވެ.

މިއަދުން ފެށިގެން އަންނަ ބުދަ ދުވަހުގެ ނިޔަލަށް ކުރިއަށްގެންދާ މި މުބާރާތުގެ ކުރެހުންތައް އޮންލައިންކޮށް ވެސް ނުވަތަ ސީދާ ވުޒާރާ އަށް ވެސް ހުށަހެޅޭނެއެވެ.

ހަމައެއާއިއެކު، 13 އަހަރުން ފެށިގެން 19 އަހަރުގެ ކުދިންނަށް ބައިވެރިވެވޭ ގޮތަށް މަޒުމޫނު ލިޔުމުގެ މުބާރާތެއްވެސް ކުރިއަށް ގެންދިޔުމަށް އެ ވުޒާރާއިން ނިންމާފައިވާއިރު، މި ދުވަހާއި ގުޅިގެން އަންނަ ބުދަ ދުވަހާއި ހުކުރު ދުވަހު 'އޯޝަންސް ލިޓްރެސީ ކުއިޒް'ގެ ނަމުގައި ކުރިއަށްގެންދާ ހަރަކާތެއް ބޭއްވުމަށް ވެސް ވަނީ ހަމަޖެހިފައެވެ.

ކަނޑުތަކުގެ ދުވަހުގެ މުނާސަބަތުގައި ދަރިވަރުންނަށް ކަނޑުތަކާބެހޭ މައުލޫމާތު ދިނުމުގެ ސެޝަނެއްވެސް ކުރިއަށް ގެންދިޔުމަށް މިނިސްޓްރީން ރާވާފައިވާއިރު، މި މައުލޫމާތު ސެޝަންގައި ކަނޑުތަކާއި ފަޅުތަކަށް ގެއްލުން ދިނުމުން ދުރުކުރުވުމަށް ދަރިވަރުން ޕްލެޖެއްގައި ސޮއި ކުރުން އޮންނާނެ ކަމަށް ވެސް އެ ވުޒާރާއިން މައުލޫމާތުދެއެވެ.

މި ދުވަހާއި ގުޅިގެން ކުރިއަށްގެންދާ އެންމެ ކުލަގަދަ ހަރަކާތެއްގެ ގޮތުގައި މުއްތަލިބް ފާހަގަކުރެއްވީ މަސް ރޭހެވެ. މާލޭގައި ކުރިއަށްގެންދިޔުމަށް ހަމަޖެހިފައިވާ މި މަސްރޭހުގައި މިހާރުވެސް 25 ޓީމަކުން ބައިވެރިވެފައިވާއިރު، މި ހަރަކާތް ފެށޭނީ ހުޅުމާލޭ ފެރީޓާމިނަލް ސަރަހައްދުންނެވެ.

މި ހަރަކާތްތަކުގެ އިތުރުން ވެސް ކަނޑުތަކުގެ ދުވަސް ފާހަގަކުރުމުގެ ގޮތުން  ފަޅުތެރެ ސާފު ކުރުމުގެ ޕްރޮގްރާމެއް ވެސް ކުރިއަށްގެންދިޔުމަށް މަސްވެރިކަމާއި ބެހޭ ވުޒާރާއިން ވަނީ ނިންމާފައެވެ.