ދިވެހި ޤައުމިއްޔަތު މަޝްރޫޢުގެ ވިލަރެސްވެރީންނަށް ޚާއްސަކޮށް، ނޫސްވެރިކަމުގެ ތަމްރީނު ޕްރޮގްރާމެއް މިއަދު ފަށައިފިއެވެ.

މިއަދު ދިވެހިބަހާއި ސަޤާފަތާއި ތަރިކައާ ބެހޭ ވުޒާރާއިން ހާމަކުރެއްވި ގޮތުގައި، މި ކޯހަކީ ޤައުމިއްޔަތު މަޝްރޫޢުގެ ވިލަރެސްވެރީންނަށް، ނޫސްވެރިކަމުގެ ދަޢުރު ވިސްނިފައި އޮތުމާއި މިދާއިރާގެ ތަޖުރިބާއަކީ މުހިންމު ކަމެއް ކަމަށް ވާތީ، އެ ފަރާތްތަކަށް ޚާއްސަކޮށްގެން ބާއްވާ ނޫސްވެރިކަމުގެ ތަމްރީނުދިނުމުގެ ކޯހެކެވެ.

މިއަދު ފެށި މި ކޯސް، ޖޫން މަހުގެ 12 ވަނަ ދުވަހުގެ ނިޔަލަށް ކުރިއަށް ދާނެއެވެ. މި ކޯހުގައި ޖުމުލަ 24 ގަޑިއިރު ކިޔަވައިދިނުމަށް ނިންމާފައިވާއިރު، ކޯސް ކުރިއަށް ގެންދިޔުމަށް ހަމަ ޖެހިފައިވަނީ ދިވެހި ބަހާއި ސަޤާފަތާއި ތަރިކައާ ބެހޭ ވުޒާރާގައެވެ.

މި ކޯހުގައި ކިޔަވައިދެއްވާނީ، ނޫސްވެރިކަމުގެ ދާއިރާގައި ރާއްޖޭގައި ތިއްބެވި އެންމެ ތަޖުރިބާކާރު ބޭފުޅުންކަމަށް ދިވެހި ބަހާ ބެހޭ ވުޒާރާއިން މައުލޫމާތުދެއެވެ. އެގޮތުން، މި ކޯހުގައި ކިޔަވައިދެއްވާ ހުރިހާބޭފުޅުންނަކީވެސް، ނޫސްވެރިކަމުގައި 25 އަހަރަށް ވުރެ ގިނަ ދުވަހު ޚިދުމަތްކުރައްވައި، ނޫސްވެރިކަން ނުވަތަ ލިޔުންތެރިކަމުގެ ރޮނގުން ޤައުމީ އިނާމު ހާސިލްކުރައްވާފައިވާ ބޭފުޅުންކަން ފާހަގަކޮށްލެވެއެވެ.

ކޯހުގައި ކިޔަވައިދެއްވާ  ބޭފުޅުންނާ، ދިވެހި ބަހުގެ ވަޒީރު، އާދަމް ނަސީރު އިބްރާހީމް، އިއްޔެ ވަނީ ބައްދަލުކުރައްވާ، ކޯސް ކުރިއަށްދާނެ ގޮތާއި، ކޯހުގައި ހިމެނޭ ބައިތަކާ ބެހޭގޮތުން މަޝްވަރާ ކުރައްވާފައެވެ.

މިއަދު ފެށި ކޯހުގައި ކިޔަވައިދިނުމަށް ހަމަޖެހިފައިވާ މައިގަނޑު ބައިތަކުގެ ތެރޭގައި، ޚަބަރު ދެނެގަންނާނެ ގޮތާއި، ޚަބަރު އެކުލަވައިލައި ލިޔާނެ ގޮތާއި، އިންޓަވިއުކުރާނެ ގޮތާއި ފީޗަރ ރިޕޯޓް ލިޔާނެ ގޮތްތައް ހިމެނެއެވެ. އަދި ނޫސްވެރިކަމުގެ އަޚްލާޤާ ބެހޭ ގޮތުންނާއި ކާމިޔާބު ނޫސްވެރިއަކަށް ވުމުގެ ޢަޒުމާއި ހިތްވަރުގެ މައްޗަށާއި ތަރުޖަމާ ކުރުމުގެ ފަންނުގެ މައްޗަށާއި ނޫސްވެރިކަމުގެ ބަހުގެ ހަމައިގެ މައްޗަށާއި ނިއުސްރޫމް މެނޭޖްމަންޓުގެ މައްޗަށާއި ފޮޓޯ އަދި ވީޑިއޯ ޖާނަލިޒަމްގެ މައްޗަށާއި މީޑިއާގެ ތަފާތު ވައްތަރުތަކުގެ މައްޗަށާއި ފޭކް ނިއުސް ވެސް މި ތަމްރީން ޕްރޮގްރާމްގައި ކިޔައިދޭނެ ކަމަށް ވުޒާރާއިން މައުލޫމާތު ދިނެވެ.

ދިވެހި ޤައުމިއްޔަތު ދިރުވުމުގެ ގޮތުން މި ނޫންވެސް ގިނަ މަސައްކަތްތަކެއް ސަރުކާރުން ދަނީ ކުރައްވަމުންނެވެ. އެގޮތުން ދިވެހި ޤައުމިއްޔަތު ދިރުވުމުގެ ކަންކަމާ ގުޅޭ ތިން އިދާރާއެއް އުފެއްދެވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވާއިރު، މި ފެށުނު ދިރާސީ އައު އަހަރު، 11 ސުކޫލެއްގައި ޤައުމިއްޔަތު ވަކި މާއްދާއެއްގެ ގޮތުގައި ކިޔަވައިދޭން ފަށާފައިވާކަން ފާހަގަކޮށްލެވެއެވެ.