މަރާލާފައިވާ މީހުންނާއި، ގެއްލުވައިލާފައިވާ މީހުންގެ މައްސަލަތައް ތަޙުޤީގުކުރާ ކޮމިޝަން (މަރު ކޮމިޝަން) އުވާަލައިފިއެވެ.

ކުރީ ސަރުކާރުން އުފެއްދި މި ކޮމިޝަން އުވާލާފައިވަނީ ރައީސް ޑރ. މުހައްމަދު މުއިއްޒު މިއަދު ނެރުއްވި ގަރާރަކުންނެވެ.

ނަމަވެސް މި ކޮމިޝަން އުވާލި ސަބަބެއް ސަރުކާރުން ހާމަކޮށްފައެއް ނުވެއެވެ.

Advertisement

ރާއްޖޭގައި ހިނގާފައިވާ ބޮޑެތި މަރުގެ މައްސަލަތައް ތަހުގީގުކުރަން، މަރު ކޮމިޝަން އުފައްދާފައިވަނީ، 2018 ވަނަ އަހަރުގެ ނޮވެމްބަރު މަހުއެވެ.

މަރު ކޮމިޝަނުން، ނޫސްވެރިޔާ އަޙްމަދު ރިޟްވާން ގެއްލުވާލި މައްސަލައާއި ބްލޮގަރު ޔާމީން ރަޝީދު މަރާލި މައްސަލަ އަދި ކުރީގެ މަޖިލިސް މެމްބަރު ޑރ. އަފްރާޝިމް އަލީ މަރާލި މައްސަލަ ތަޙްގީގު ކޮށްފައެވެ.

މަރު ކޮމިޝަން އުވާލިއިރު، ތަހުގީގުކުރި މައްސަލަތަކާ ގުޅިގެން ޢާއިލާތަކަށް އެނގެންޖެހޭ ބައެއް މުހިންމު މައުލޫމާތުތައް ހުރުމާއެކު ސިއްރުކުރަންޖެހޭ މުހިންމު މައުލޫމާތުތައް އުނިކުރުމަށްފަހު އެ ރިޕޯޓު އާއިލާތަކަށް ހިއްސާކުރުމަށް، ރައީސް ޑރ.މުއިއްޒަށް ހުށަހަޅާނެ ކަމަށް ކޮމިޝަނުން ވަނީ ބުނެފައެވެ. އަދި ތަހުގީގުގެ ބޭނުމަށް އެއްކުރި ހުރިހާ މައުލޫމާތަކާއި ތަކެތި ރައީސް އޮފީހާ ހިއްސާކުރަން ތައްޔާރުވަމުންދާ ކަމަށްވެސް ބުނެފައިވެއެވެ.