ޗައިނާގެ ޝަންހާއީ އޯޝަން ޔުނިވަރސިޓީއާއެކު މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާ އިން މަޝްވަރާ ބައްދަލުވުމެއް ބާއްވައިފިއެވެ.

މި ބައްދަލުވުމުގައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ފަރާތުން ބައިވެރިވަޑައިގަތީ، ސްޓޭޓް މިނިސްޓަރު ޑރ. އަމްޒަތު އަހުމަދާއި ޑެޕިއުޓީ މިނިސްޓަރު އަހުމަދު ޝާފިއުއެވެ. އަދި، ޝަންހާއީ އޯޝަން ޔުނިވަރސިޓީގެ ފަރާތުން ޔުނިވަރސިޓީގެ ޗެއަރމަން، ވަންގް ހޮންޒޫއާއި، ބައެއް އިސްވެރިންވެސް ބައިވެރިވެވަޑައިގަތެވެ.

އެ ބައްދަލުވުމުގައި، ޗެއަރމަން، ވަންގް ހޮންޒޫ، ރާއްޖޭގެ މަސްވެރިކަމުގެ ދާއިރާއާއި ކަނޑުގެ ދިރާސާތަކަށް ފަންނީ ގޮތުންނާއި އެހެނިހެން ގޮތް ގޮތުން އެހީތެރިކަން ފޯރުކޮށްދިނުމަށް އެ ޔުނިވަރސިޓީއިން ޝައުގުވެރިވާކަން ހާމަކޮށްފައި ވެއެވެ.

Advertisement

އެގޮތުން، ރާއްޖޭގެ މެރިން ރިސާޗް އިންސްޓިޓުއުޓް އިތުރަށް ތަރައްޤީކުރުމަށް އެހީތެރިކަން ފޯރުކޮށްދިނުމަށް ބޭނުންވާކަމަށް ވަން ހޮންޒޫ ވިދާޅުވިއެވެ. އަދި، ރާއްޖޭގެ ޔުނިވާސިޓީގެ ދަރިވަރުން ތަމްރީނުކުރުމަށް، ޑިގްރީ ކޯސްތަކުގައި ކިޔެވުމަށް އެ ޔުނިވާސިޓީއަށް ރާއްޖޭގެ ދަރިވަރުންނަށް ވަން ހޮންޒޫ ދައުވަތު ދެއްވިއެވެ.

މި ބައްދަލުވުމުގައި، ރާއްޖޭގައި ގާއިމްކުރަމުން އަންނަ "ފިޝަރީޒް ކޮލެޖު" އަށް އެކި ދާއިރާތަކުން އެހީތެރިކަން ފޯރުކޮށްދިނުމަށް ޗައިނާގެ ޔުނިވަރސިޓީއިން ޝައުގުވެރިކަން ފާޅުކޮށްފައިވެއެވެ. އެގޮތުން، ލެކްޗަރާއިން ތަމްރީނު ކުރުމާއި ދިރާސާ ކުރުމާއި ދަރިވަރުން ތަމްރީނުކުރުމުގެ ދާއިރާއިން އެހީތެރިކަން ފޯރުކޮށްދޭނެ ބޭނުންވާކަން ވަން ހޮންޒޫ ފާހަގަކުރެއްވިއެވެ.

މީގެ ިއިތުރުން ޒުވާނުން، މަސްވެރިކަމާއި ކަނޑުގެ ދިރާސާތައް ކުރުމަށް ޝައުގުވެރިކުރުވުގެ ގޮތުން އެކްސްޗޭންޖު ޕްރޮގްރާމްތަކަށް މަރުހަބާ ކިޔާނެކަމަށާއި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް ކުރެއްވި ދަތުރުފުޅުގައި ދެ ގައުމު ގުޅިގެން މެރިން ރިސާޗް ދާއިރާ ކުރިއެރުވުމަށް ކުރި މަޝްވަރާތައް ހަގީގަތަކަށް ހެދުމަށް އެ ޔުނިވަރސިޓީގެ ފުރިހަމަ އެއްބާރުލުން ލިބޭނެކަމަށް ވެސް ބައްދަލުވުމުގައި ވަން ހޮންޒޫ ވިދާޅުވިއެވެ.

މި ބައްދަލުވުމުގައި، ސްޓޭޓް މިނިސްޓަރު ޑރ. އަމްޒަތު ވަނީ، ޝަންހާއީ އޯޝަން ޔުނިވަރސިޓީއާއެކު ގާތް ގުޅުމެއް އުފައްދައި އެކި ދާއިރާތަކުން ދެ ގައުމު ގުޅިގެން މަސައްކަތް ކުރުމަކީ މުހިންމުކަމެއް ކަމުގައި ވިދާޅުވެފައެވެ.

ބައްދަލުވުން ނިންމާލައްވާފައިވަނީ، ޝަންހާއީ އޯޝަން ޔުނިވަރސިޓީއާއި މިނިސްޓްރީއާއެކު އެއްބާރުލުން ޤާއިމުކޮށް ކަމާގުޅޭ ދާއިރާތަކުން ގުޅިގެން މަސައްކަތްކުރުމަށް  އެއްބަސްވުމެއްގައި ސޮއިކުރުމުގެ މަސައްކަތް ފެށޭނެކަމުގެ އިޝާރާތާ އެކުގައެވެ.

ޝަންހާއީ އޯޝަން ޔުނިވަރސިޓީއަކީ، މެރިން ސައިންސްގެ ދާއިރާއިން ފާހަގަކޮށްލެވޭ ޔުނިވަރސިޓީއެކެވެ. އެގޮތުން އެ ޔުނިވާސިޓީން ދުނިޔޭގެ އެކި ގައުމުތަކުގެ 150 އަށް ވުރެ ގިނަ ޔުނިވަރސިޓީއާއެކު މަސައްކަތްކުރަމުންދާކަން ފާހަގަކޮށްލެވެއެވެ.