ފީ ނުދައްކާ ދިހަހާހަށްވުރެ ގިނަ ފަރާތްތަކުގެ ނަންމަތީ ލައްކައަކަށްވުރެ ގިނަ ބިދޭސީން އެބަ ތިބިކަމަށް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވިދާޅުވެއްޖެއެވެ. 

އެ ވުޒާރާއިން މިއަދު ހާމަ ކުރެއްވިގޮތުގައި ދިވެހިރާއްޖޭގައި ވަޒީފާ އަދާކުރާ ބިދޭސީންނާ ގުޅިގެން ދޫކުރާ ހުއްދަތަކަށް ޤާނޫނުގެ ދަށުން ދައްކަން ޖެހޭ ފީތަކާއި ޖޫރިމަނާ ނުދައްކާ 10،619 ވަޒީފާ ދޭ ފަރާތް އެބަ ތިއްބެވެ. އަދި އެ ފަރާތް ތަކުގެ ނަންމަތީ ރަޖިސްޓްރީ ކުރެވިފައި 102،807 ބިދޭސީ މަސައްކަތް ތެރިން އެބަ ތިބި ކަމަށްވެސް އެ ވުޒާރާއިން ހާމަކުރެއްވިއެވެ. 

ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން އިތުރަށް ހާމަކުރެއްވިގޮތުގައި ބިދޭސީ މަސައްކަތްތެރިންގެ ފީގެ ގޮތުގައި ދައުލަތަށް ދައްކަންޖެހޭ 1،765،704،400 ރުފިޔާ، ވަޒީފާ ދޭ ފަރާތްތަކުން ދަޢުލަތަށް ނުދައްކާ އެބަ ހުއްޓެވެ.

މި ފީތަކާއި ޖޫރިމަނާގެ ފައިސާ މިމަހުގެ 18 ވަނަ ދުވަހުގެ ކުރިން ނުދައްކައިފިނަމަ، ފީތަކާއި ޖޫރިމަނާ ނުދައްކާ ފަރާތްތަކުގެ ނަން ޢާންމުކުރާނެ ކަމަށާއި، ސަސްޕެންޑުކުރާނެކަމަށްވެސް ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވަނީ ވިދާޅުވެފައެވެ. 

ޤަވާއިދާ ޚިލާފަށް ބިދޭސީން ގެންގުޅުމުގެ މައްސަލަ ރާއްޖޭގައި ބޮޑުވެފައި ވާއިރު، ސަރުކާޜުން ދަނީ މި މައްސަލަ ޙައްލުކުރުމަށް ގިނަ މަސައްކަތްތަކެއް ކުރައްވަމުންނެވެ. އެގޮތުން "އޮޕެރޭޝަން ކުރަނގި" ގެ ނަމުގައި، ބޮޑު އޮޕެރޭޝަނެއް ފަށާ، ރާއްޖޭގައި އުޅޭ ހުރިހާ ބިދޭސީންގެ ފޮޓޮއާއި އިނގިލީގެ ނިޝާން ނަގަން ފަށާފައިވާއިރު، ބިދޭސީ މަސައްކަތްތެރިން ރާއްޖެއަށް ގެނައުމުމުގައި ޢަމަލުކުރުމަށް މިހާރަށްވުރެ ހަރުދަނާ ނިޒާމެއް ޤާއިމުކުރުމަށް މަސައްކަތް ކުރަމުންދާކަމަށް މިއަދު ކުރެއްވި އިޢުލާނެއްގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން ވަނީ ވިދާޅުވެފައެވެ.