ކުށުގެ ރެކޯޑު ސާފުކޮށްދިނުން މިހާރަށްވުރެވެސް އަވަސްކޮށް، ދުވަހުން ދުވަހަށް ލިބޭގޮތް ހަމަޖައްސާފައިވާ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ހާމަކޮށްފިއެވެ.

ޕީޖީ އޮފީހުން ހާމަކުރެއްވިގޮތުގައި، އެ އޮފީހުން ކުށުގެ ރެކޯޑު ސާފުކުރުމަށް އޮފީހުގެ ކައުންޓަރަށް ހުށަހަޅާ ފޯމުތައް، މީގެ ކުރިން ދޫކުރުމުން ދިޔައީ، ފޯމު ހުށަހަޅާ ދުވަހާ ޖެހިގެން އަންނަ ދުވަހުއެވެ. ނަމަވެސް، ރައްޔިތުންނަށް ފޯރުކޮށްދޭ ޚިދުމަތްތައް ވީހައިވެސް ލުއިފަސޭހަކޮށްދިނުމުގެ ގޮތުން، ކޮންމެ ދުވަހަކު ހެނދުނު ހުށަހަޅާ ކުށުގެ ރެކޯޑު ސާފުކުރާ ފޯމުތައް، ދުވަހުން ދުވަހަށް ލިބޭގޮތް ހަމަޖައްސާފައިވާކަމަށް އެ އޮފީހުން ބުންޏެވެ.

އެ އޮފީހުން މައުލޫމާތު ދެއްވި ގޮތުގައި، މިއަދުން ފެށިގެން ކޮންމެ ދުވަހަކުވެސް، ހެނދުނު ހުށަހަޅާ ފޯމްތައް އެ ދުވަހުގެ މެންދުރު 1:30 ގައި ލިބޭނެވެ. އަދި އެ ދުވަހެއްގެ މެންދުރު 12 ގެ ފަހުން ހުށަހަޅާ ފޯމްތައް ޖެހިގެން އަންނަ ދުވަހުގެ ހެނދުނު 9 ޖަހާއިރު ލިބޭނެ ކަމަށްވެސް ޕީޖީ އޮފީހުން ވަނީ ބުނެފައެވެ.

Advertisement

ޕީޖީ އޮފީހުން އިތުރަށް ފާހަގަކުރެއްވި ގޮތުގައި، އޮންލައިންކޮށް ކުށުގެ ރެކޯޑު ސާފުކުރުމަށް ހުށަހަޅާ މީހުންގެ ރެކޯޑު، ދިހަ މިނިޓު ތެރޭގައި ސާފުކޮށްދިނުމުގެ ޚިދުމަތް އެއޮފީހުން މިހާރުވެސް ދަނީ ފޯރުކޮށްދެމުންނެވެ.