ސިވިލް ސާވިސްގެ މުވައްޒަފުނަކީ ހިނިތުންވުމާއި އޯގާތެރިކަމާއެކު އަވަސް ޚިދުމަތެއް ރައްޔިތުންނަށް ފޯރުކޮށްދޭ ބަޔަކަށް ވުމަށް ނައިބު ރައީސް ހުސައިން މުހައްމަދު ލަތީފް މިއަދު އެދިވަޑައިގެންފިއެވެ.
ދިވެހި ސިވިލް ސާވިސް ކޮންފަރެންސް 2024 އިފްތިތާހުކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވާ ނައިބު ރައީސް ވިދާޅުވީ، އޭރަކު އޮންނަ ސަރުކާރަކުން ކަނޑއަޅާ އަމާޒަކަށް ގައުމު ގެންގޮސްދީ، ރައްޔިތުންނަށް ވެފައިވާ ވައުދުތައް ފުއްދައިދިނުމަށް މަސައްކަތްކުރާ އެއް ބަޔަކީ ސިވިލް ސާވިސްގެ މުވައްޒަފުން ކަމަށެވެ. އެގޮތުން ކޮންމެ ސަރުކާރެއްގެވެސް އަމާޒަށް ވާސިލް ވުމަށް މުރާލި ކަމާއެކު ސިވިލްސާވަންޓުން މަސައްކަތް ކުރަމުންދާކަން ނާއިބް ރައީސް ފާހަގަކުރެއްވިއެވެ. އެކަމަށްޓަކައި ސިވިލް ސާވިސް މުވައްޒަފުންނަށް ނާއިބު ރައީސް ވަނީ ޝުކުރު އަދާކުރައްވާފައެވެ.
މިއާއެކު ނާއިބު ރައީސް ވިދާޅުވީ ރައްޔިތުންނަށް ޚިދުމަތްކުރުމަކީ ވަރަށް ކެތްތެރިކަމާ ކަމޭހިތުމާއެކު އަދާކުރަންޖެހޭ ވަރަށް ބޮޑު ޒިންމާއެއްކަމަށެވެ. އަދި ސަރުކާރުގެ ކޮންމެ ވުޒާރާއަކާ ކޮންމެ އޮފީހަކުން ވެސް ފަސޭހަކަމާއެކު ޚިދުމަތް ލިބެން ކޮންމެ ރައްޔިތަކު ވެސް ބޭނުންވާނެ ކަމަށް އެމަނިކުފާނު ވިދާޅުވިއެވެ.
"ޚިދުމަތަކަށް ރައްޔިތަކު ދާއިރު އިސްތިގުބާލުކުރަން ތިބޭނީ ސިވިލް ސާވިސް މުވައްޒަފަކު. ރައްޔިތުންގެ އަޑު އަހަން، ސުވާލުތަކަށް ޖަވާބުދާރީވާން، ކަންކަން ފަހިކޮށްދޭން، ހަލުވިކޮށްދޭން، މަގުފަހިކޮށްދޭން ތިބޭނީ ހަމަ ސިވިލް ސާވިސް މުވައްޒަފުން. އެހެންކަމުން ސަރުކާރެއް ހިންގުމަށް ސިވިލް ސާވިސް މުވައްޒަފުން ވަރަށް މުހިންމު ދައުރެއް އެބަ އަދާކުރޭ. ސިވިލް ސާވިސްގެ އެއްބާރުލުމާއި އެހީތެރިކަން ދިވެހި ސަރުކާރަށް ބޭނުންވޭ،"
ނައިބު ރައީސް ހުސައިން މުހައްމަދު ލަތީފް
މިއާއެކު ނާއިބު ރައީސް ވަނީ ސިވިލް ސާވިސްގެ މުވައްޒަފުން، ޚިދުމަތް ދިނުމުގައި މުހިންމު ދެކަމަކަށް އިސްކަންދެއްވުމަށް އެދިވަޑައިގެންފައެވެ.
އެއްކަމަކީ ހިނިތުންވުމާއެކު އޯފާތެރި ޚިދުމަތެއް ދިނުން. ދިވެހި ސިވިލް ސާވިސް ކޮންމެ މުވައްޒަފަކީވެސް ޚިދުމަތް ހޯދުމަށް އަންނަ ކޮންމެ ދޭސީއެކާއި ކޮންމެ ބިދޭސީއަކަށް ވެސް އޯގާތެރިކަމާއެކު މުއާމަލާތް ކުރައްވާ ބޭފުޅަކަށް ވުން އެދެން. ދެވަނަ ކަމަކަށް އަޅުގަނޑު ފާހަގަކޮށްލާނީ ވަރަށް ހަލުވިކަމާ، ކުރިއަރަމުންދާ ޓެކްނޮލޮޖީއާއެކު ޒަމާނާ ގުޅޭ ޚިދުމަތް ދިނުން. ކިޔުގައި ޖެހިގެން އެތައް އިރަކު ހިދުނަތް ހޯދަން ތިވެން ޖެހުމީ މިޒަމާނުގެ ޓެކްނޮލޮޖީއާއެކު ހައްލު ހޯދޭނެ ކަންކަން. އޮފީސް ދޮށަށް ނައިސް ގޭގައި އިނދެގެން އޮންލައިންކޮށްޗެސް ހިދުމަތް ލިބެންޖެހޭ.
ނައިބު ރައީސް ހުސައިން މުހައްމަދު ލަތީފް
މިއާއެކު ނައިބު ރައީސް ވަނީ، ޚިދުމަތް ދިނުމަށްފަހު ޚިދުމަތް ހޯދާ ފަރާތްތަކުން އެ ޚިދުނަތާއި މެދު ދެކޭ ގޮތް ބަލައި ރަނގަޅު ކުރަން ހުންނަ ކަންކަން ރަނގަޅުކުރުމަށް މަސައްކަތް ކުރުމަށްވެސް އެދިވަޑައިގެންފައެވެ.
އަދި ރައީސް ޑރ. މުޙައްމަދު މުއިއްޒުގެ އެންމެ މުހިންމު މޮޓޯއަކީ، ރައްޔިތުންނަށް ދެއްވާ ޚިދުމަތްތައް ހަލުވިކޮށް، ޒަމާނީ ކުރައްވާ، ރައްޔިތުން އެދޭ އަމާޒަށް ޚިދުމަތުގެ ފެންވަރު ގެންގޮސްދެއްވުމަށް ރެއާ ދުވާލު މަސައްކަތްކުރެއްވުން ކަމަށްވާއިރު ރައީސްގެ މި އަމާޒަށް ވާސިލުވުމަށް މަސައްކަތްކޮށްދެއްވުމަށް ނާއިބު ރައީސް ވަނީ ސިވިލް ސާވިސް މުވައްޒަފުންގެ ކިބައިން އެދިވަޑައިގެންފައެވެ.
Advertisement
This content is created and paid for by advertisers and does not involve Voice Journalists
