ރައީސުލްޖުމްހޫރިއްޔާގެ އެދި ލެއްވުމަށް، ފަލަސްތީނުގެ ރައްޔިތުންނަށް އެހީވުމަށް ޕީއެސްއެމްއިން ކުރިއަށް ގެންދާ "ފަލަސްތީނާއެކު ދިވެހީން" ޓެލެތޯނަށް ޕީއެންސީގެ ޕާލިމެންޓަރީ ގްރޫޕުގެ ފަރާތުން 2 ލައްކަ ރުފިޔާގެ އެހީއެއް ފޯރުކޮށްދެއްވައިފިއެވެ.

މި ޓެލެތޯން ފެށުމަށް މިއަދު ބޭއްވުނު ރަސްމިއްޔާތުގައި ޕީއެންސީގެ ފަރާތުން މި ފައިސާގެ އެހީ ހަވާލުކޮށްދެއްވާފައިވަނީ ރައްޔިތުން މަޖިލީހުގެ ރައީސް އަބްދުއްރަހީމް އަބްދުاللهއެވެ. އެ ފައިސާއާ ޕީއެސްއެމްގެ ފަރާތުން ހަވާލުވެލެއްވީ ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރެވެ.

މި ރަސްމިއްޔާތުގައި ބައިވެރިވެވަޑައިގެން ވާހަކަދައްކަވަމުން މަޖިލީހުގެ ރައީސް  އަދި ޕީއެންސީގެ ޗެއާޕާސަން އަބްދުއްރަހީމް ވިދާޅުވީ ޕީއެންސީގެ ފަރާތުން އިސްނަގައިގެން ފަލަސްޠީނުގެ ރައްޔިތުންނަށް އެހީވުމަށް އަވަސްވެގަތުމުގެ މައިގަނޑު ސަބަބަކީ ދިވެހި ރައްޔިތުންގެ ލޯބި އެބަޔަކަށް އެންމެ ބޮޑަށް ލިބިފައިވާ ބަޔަކީ ފަލަސްޠީނުގެ ރައްޔިތުންނަށް ވުމުންކަމަށެވެ.

Advertisement

މިކަމާއި ގުޅިގެން ރައީސް އިސްނަންގަވައިގެން ފެއްޓެވި ޓެލެތޯންގައި ރައްޔިތުން ތަމްސީލު ކުރުމަކީ ވަރަށް މުހިންމު ކަމެއް ކަމަށްވެސް އަދުރޭ ވިދާޅުވިއެވެ.

އަބްދުއްރަހީމް ވަނީ، ކުޑަ ވަގުތުކޮޅެއްގެ ތެރޭގައި މިފަދަ ބޮޑު އަދަދެއް ޕީއެންސީގެ ޕީޖީ ގްރޫޕުގެ ފަރާތުން ފަލަސްޠީނަށް ހަދިޔާކުރެވުނީ ހުރިހާ މެންބަރުންގެ ދީލަތި އެހީއާއެކުގައިކަން ފާހަގަކުރައްވާފައެވެ. 

އަދި ރާއްޖޭގެ ވެރިކަން ކުރައްވާފައިވާ ބޭފުޅުންގެ ތެރެއިން، ފަލަސްތީނުގެ މައްސަލާގައި އެންމެ ބޮޑަށް ސަމާލުކަމެއް ދެއްވައިގެން މަސައްކަތްކުރައްވާ ރައީސްއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުކަމަށާއި، ރައީސް ކުރައްވަމުންގެންދަވާ މަސައްކަތްޕުޅަށް އަބްދުއްރަހީމް ވަނީ ޝުކުރުދަންނަވާފައެވެ. 

މީގެ އިތުރުން، ފަލަސްޠީނުގެ ރައްޔިތުންނަށް އެހީވުމަށްޓަކައި ދިވެހި ހުރިހާ ފަރުދުންގެ އެއްބާރުލުން ބޭނުންވާކަން ފާހަގަކުރައްވައި އަބްދުއްރަހީމް ވަނީ، ވަކި ފިކުރަކަށް ނުބައްލަވާ، ދިވެހި ރައްޔިތުން ބައިވެރިވެ ދިވެހިންގެ ހިތްތަކުގައި ފަލަސްތީނުގެ ރައްޔިތުންނާއި މެދު އޮތް ލޯތްބާއި ކަންބޮޑުވުން ހާމަކޮށްދިނުމަށް އެދިލައްވާފައެވެ.

'ފަލަސްޠީނާއެކު ދިވެހީން' ޚާއްޞަ ޓެލެތޯނުގެ ކަންކަން ދެފުށް ފެންނަ ގޮތަށް ކުރިއަށް ގެންގޮސް، މިހަރަކާތުން ލިބޭ ފައިސާ އޭގެ ހައްގުވެރިންނާ ހަމައަށް ފޯރާކަން ޔަޤީންކުރުމަށް މިނިވަން އޮޑިޓަރެއް ވަނީ ހަމަޖައްސަވާފައެވެ. 

މި ޓެލެތޯން ކުރިއަށް ދާނީ މިރޭ 12 ޖެހުމާ ހަމައަށެވެ. މި ޓެލެތޯނުގައި މާލެ ސިޓީގެ އެކި ސަރަހައްދުގައި 13 ފަންޑު ފޮށިވަނީ ބަހައްޓާފައެވެ.

މީގެ އިތުރުން މި ފޮށިތައް ކައިރިއަށް ނުދެވޭ ފަރާތްތަކަށްވެސް އޮންލައިންކޮށް ފަސޭހަކަމާއެކު ފައިސާ ޖަމާކުރެވޭނެ އިންތިޒާމް ހަމަޖެއްސެވުމަށް 2 އެކައުންޓެއްވަނީ ހުޅުވާފައެވެ. އެގޮތުން ފައިސާ ޖަމާކުރެވޭނީ ދިވެހި ފައިސާއިންނަމަ 7730000655865 އަދި ޑޮލަރުން ނަމަ، 7730000655866 އެކައުންޓަށެވެ.