ބިދޭސީން ރަށްރަށުގައި މަސައްކަތްކުރަން ހޯދަންޖެހޭ ޕާމިޓަށް އިތުރު ޚަރަދެއް ކުރަން ނުޖެހޭނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.
މިއަދު އެކްސްގައި ކުރެއްވި ޕޯސްޓެއްގައި ވަޒީރު އިހްސާން ވިދާޅުވީ، ރާއްޖޭގައި މަސައްކަތްކުރަން ދޭ ވަރކްޕާމިޓުގެ އިތުރުން، އެމީހަކު މަސައްކަތް ކުރާ ރަށަކުންވެސް ހޯދަން ޖެހޭ ޕާމިޓަށް އިތުރު ފީއެއް ނަގަން މަޝްވަރާކޮށްފައި ނުވާކަމަށެވެ.
ވަޒީރު މިއަދު އެކްސްގައި ކުރެއްވި ޕޯސްޓްގައި އިތުރަށް ވިދާޅުވީ، ވަކި ވަކި ރަށްރަށުން ހޯދަން ޖެހޭ ޕާމިޓު، ހޯދާނީ، އިލެކްޓްރޯނިކް ވަސީލަތްތައް ބޭނުންކޮށްގެން، އީ-ރަޖިސްޓްރޭޝަނެއް ކޮށް، ރަށު ކައުންސިލްތަކުން އެޕްރޫވް ކުރުވައިގެން ކަމަށެވެ.
ރާއްޖޭގައި މަސައްކަތްކުރަން ދޭ ވަރކްޕާމިޓުގެ އިތުރުން، އެމީހަކު މަސައްކަތް ކުރާ ރަށަކުންވެސް ވަކި ވަރކް ޕާމިޓެއް ހޯދަން ޖެހޭގޮތް ހަދަން މަސައްކަތް ކުރާ ކަމަށް، ވަޒީރު އިޙްސާން ވިދާޅުވީ، ދައުލަތުގެ މީޑިޔާއަށް މައުލޫމާތު ދެއްވަމުން މިމަހުގެ 17 ވަނަ ދުވަހުއެވެ.
މި އައު ޕާމިޓަކީ، ތިން އަހަރު ދުވަސް ތެރޭ، ލިޔެކިޔުންތައް ނެތް ބިދޭސީންގެ މައްސަލަ ޙައްލުކުރުމަށް ހިފާފައިވާ އަމާޒުގެ ދަށުން ތަޢާރަފްކުރަން ނިންމާފައިވާ ކަމެއް ކަމަށްވެސް ވަޒީރު އިޙްސާން ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
