ހައްދުފަހަނައަޅާފައިވާ އިސްރާއީލުން ލުބުނާނަށް އަމާޒުކޮށް ހަމަލާދީފިނަމަ، އިސްރާއީލު ސުންނާފަތިވާވަރަށް ހަމަލާދޭނެ ކަމަށް ހިޒްބުﷲ ގެ އިސްވެރިޔާ ހަސަން ނަސްރުﷲ ވިދާޅުވެއްޖެއެވެ.

ނަސްރުﷲ މިފަދައިން ވިދާޅުވީ، ހިޒްބުﷲއާ ދެކޮޅަށް ހަނގުރާމަކުރަން ހުރިހާ ގޮތަކުން ވެސް ތައްޔާރަށް އޮތް ކަމަށް އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫގެ ސަރުކާރުން އިޝާރާތްކުރުމާއި ގުޅިގެން ދެއްވި ތަގުރީރެއްގައެވެ.

މިގޮތުން ނަސްރުﷲ ވިދާޅުވީ، މި ހަނގުރާމައިގައި އިސްރާއީލާއި ކުރިމަތިލާއިރު، ހަމަލާތައް ދޭނީ އެއްވެސް އުސޫލެއް ނެތި , "ސީލިންއެއް ނެތި" ކަމަށާއި ހިޒްބުﷲގެ ހަމަލާތައް އަމާޒަށް ފޯރާއިރު، އެ ހަމަލާތަކުން އިސްރާއީލަށް ސަލާމަތް ނުވެވޭނެ ކަމަށެވެ.

އިސްރާއީލުން ލުބުނާނުގައި ހަނގުރާމަ ފަށާނެ ކަމަށް އިންޒާރުދީ، ވާހަކަދެއްކުމުން ބިރު ނުގަންނަކަމަށާއި، ހަނގުރާމައެއް ފަށާނަމަ ހަގީގަތުގައި ބިރުގަންނަންވީ އިސްރާއީލު ކަމަށް ވެސް ނަސްރުﷲ ވިދާޅުވިއެވެ.

ނަސްރުﷲ އިތުރަށް ވިދާޅުވީ، އިސްރާއީލަށް އަމާޒުކޮށް ހަމަލާދޭއިރު، އޭގެ ތެރޭގައި މެޑިޓެރޭނިއަން ކަނޑުގައި ހުރި ޔަހޫދީންގެ ޓާގެޓްތައް ވެސް ހިމެނޭ ކަމަށެވެ. އަދި ސައިޕްރަސްގެ އެއާޕޯޓުތަކާއި މަރުކަޒުތައް ޔަހޫދީ ފައުޖުގެ އަސްކަރީ ތަމްރީނުތަކަށް ބޭނުންކުރުމުގެ ހުއްދަ ދޫކުރާ ކަމުގެ މައުލޫމާތު ހިޒްބުﷲ އަށް ލިބިފައިވާ ކަމަށާއި، މި ތަންތަނަކީ ހަނގުރާމައިގެ ހާލަތުގައި އިސްރާއީލުން ބޭނުންކުރުމަށް ރާވާފައިވާ ތަންތަން ކަމަށް އެބޭފުޅާ ވިދާޅުވިއެވެ.

މިފަދައިން ޔަހޫދީންނަށް މިތަންތަން ދޫކުރާނަމަ، ސައިޕްރަސް އަކީ ވެސް މި ހަނގުރާމައިގައި ބައެއްގެ ގޮތުގައި ހިޒްބުﷲ އިން ބަލައިގަންނާނެ ކަމަށް ވެސް ނަސްރުﷲ ވިދާޅުވިއެވެ.

މީގެ އިތުރުންވެސް، ހަމާސް ގެ ދިފާއުގައި ވާހަކަފުޅު ދައްކަވަމުން ނަސްރުﷲ ވަނީ ޣައްޒާގައި ޔަހޫދީން ހިންގަމުންދާ ގަތުލުއާއްމު ހުއްޓާލުމާއި ގުޅޭ ގޮތުން އެމެރިކާއިން ހުށަހެޅި ޕްލޭނަށް ބައެއް ބަދަލުތައް ގެނައުމަށް ހަމާސް އިން ނިންމި ނިންމުމަށް ތާއީދުކުރައްވާ، ތައުރީފް ކުރައްވާފައެވެ.