ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފެއްޓެވި ކަންކަން އެ މަނިކުފާނު ބޭނުންފުޅުވާ ގޮތަށް ކުރިޔަށްދާނެ ކަމަށާއި މާލެ ސިޓީ ކައުންސިލުގެ މަސައްކަތްތަކަށް ސަރުކާރުގެ އެއްބާރުލުން ލިބޭ ކަމަށް މާލެ ސިޓީ ކައުންސިލްގެ މޭޔަރު، އާދަމް އާޒިމް ވިދާޅުވެއްޖެއެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަފުޅު ދައްކަވަމުން އާޒިމް ވިދާޅުވީ، މާލޭ މޭޔަރ ކަމަށް އިންތިޚާބު ކުރެވުނާއިއެކު އޭނާގެ އަމާޒަކަށްވީ ރައީސް މުއިއްޒު ފައްޓަވާފައިވާ ކަންތައްތައް ކުރިޔަށް ގެންދިޔުން ކަމަށެވެ. 

މިއާއެކު އާޒިމް ވިދާޅުވީ، ވަކި ސަރުކާރަކުން ނުވަތަ ވަކި ބޭފުޅަކު ފެށި މަސައްކަތަކަށް ވުމުން އެ މަސައްކަތް ހުއްޓާާލުމުގެ ސަޤާފަތް ރާއްޖޭގައި ދޫކޮށްލާން ޖެހޭ ކަމަށެވެ. އެހެނީ އެފަދައިން ކަންކަން ހުއްޓާލުމުން ރައްޔިތުންގެ ވަގުތާއި އެތައް ބައިވަރު ފައިސާތަކެއް ގެއްލިގެންދާކަމަށާ، ސިޔާސީ ކޯޅުންގަނޑާ ހުރެ އެކަމަކަށް ރައްޔިތުން ކުރަމުންދާ މިންނެތް މަސައްކަތް ގެއްލި އޭގެ އަސަރު ގިނަ ރައްޔިތުންނަށް ކުރަމުންދާކަން އާޒިމް ފާހަގަކުރެއްވިއެވެ.

"އަޅުގަނޑު ދެކޭ ގޮތުގައި ރައްޔިތުން އަޅުގަނޑުމެން އިންތިހާބުކުރީ ކޯޅޭކަށެއް ނޫން، ރައްޔިތުންނަށް ޚިދުމަތް ކުރަން. އެބަޔަކަށް ހާސިލް ކުރެވޭނީ ހާސިލް ކުރަން އުޅޭ ކަމެއް، ކޯޅެން އުޅޭ ބަޔަކަށް ކޯޅެވޭނީ، ޚިދުމަތް ކުރަން އުޅޭ ބަޔަކަށް ޚިދުމަތް ކުރެވޭނީ. އެހެންވީމާ އަޅުގަނޑުމެންގެ އަމާޒަކީ ޚިދުމަތްކޮށްދިނުންް." އާޒިމް ވިދާޅުވިއެވެ. 

މީގެ އިތުރުން އާޒިމް ވަނީ ސިޓީ ކައުންސިލުން ކުރަމުންދާ މަސައްކަތް ތަކަށް ސަރުކާރެ އެއްބާރުލުން ލޮބޭކަން ފާހަގަކުރައްވައި ގުޅިގެން މަސައްކަތް ކުރައއވާނެ ކަމަށް ވިދާޅުވެފައެވެ.