ލުބުނާނަކީ ދެވަނަ ޣައްޒާއަކަށް ހެދުމުގެ ފުރުސަތު ދެވިގެންނުވާނެ ކަމަށް އދ ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވިދާޅުވެއްޖެއެވެ.
ލުބުނާނުގެ ހިޒްބުﷲ ޖަމާއަތާއި ހައްދުފަހަނައަޅާފައިވާ އިސްރާއީލާއި ދެމެދު ކުރިއަށްދާ ހަމަނުޖެހުންތަކާއި ބަހުގެ ހަމަލާތަކަށް އިޝާރާތްކުރައްވާ ގުޓަރެސް ވިދާޅުވީ، އެންމެ ގޯސް ފިޔަވަޅެއްގެ ސަބަބުން ހިޔާލަށް ވެސް ނުގެނެވޭ ވަރުގެ ހަނގުރާމައެއް ފެށިދާނެ ކަމަށާއި، އެ ސަރަހައްދުގެ ރައްޔިތުންނާއި މުޅި ދުނިޔެ އަށް ވެސް ލުބުނާނަކީ އެހެން ޣައްޒާއަކަށް ވުމުގެ ފުރުސަތު ދެވިގެންނުވާނެ ކަމަށެވެ.
މިކަމާއި ގުޅޭ ގޮތުން އީރާނުގައި ހުންނަ އދ ގެ މިޝަން އިން ބުނީ، ހިޒްބުﷲ އަށް އަމިއްލަ އަށް ދިފާއުވުމުގެ ގާބިލުކަން ލިބިފައިވާ ކަމަށާއި، އިސްރާއީލުން ލުބުނާނަށް އަރައިގަތުމުގެ ބަދަލުގައި ނާޖާއިޒު ގޮތުގައި ބާރުގެ ބޭނުންކުރުން ނިމުމަކަށް ގެންނަން ޖެހޭ ކަމަށެވެ.
އިސްރާއީލުން ލުބުނާނަށް ދެމުން އަންނަ ހަމަލާތަކުގެ ސަބަބުން ލުބުނާނުގެ ދެކުނުގެ ހިސާބުތަކުގައި ދިރިއުޅެމުންދާ މީހުން ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ދާން ފަށާފައެވެ.
އދ އިން މިފަދައިން ބުނެފައިވާއިރު، ހިޒްބުﷲ ގެ އިސްވެރިޔާ ހަސަން ނަސްރުﷲ ވަނީ ހައްދުފަހަނައަޅާފައިވާ އިސްރާއީލުން ލުބުނާނަށް އަމާޒުކޮށް ހަމަލާދީފިނަމަ، އިސްރާއީލު ސުންނާފަތިވާވަރަށް ހަމަލާދޭނެ ކަމަށް ވިދާޅުވެފައެވެ.
އިސްރާއީލުން ލުބުނާނުގައި ހަނގުރާމަ ފަށާނެ ކަމަށް އިންޒާރުދީ، ވާހަކަދެއްކުމުން ބިރު ނުގަންނަކަމަށާއި، ހަނގުރާމައެއް ފަށާނަމަ ހަގީގަތުގައި ބިރުގަންނަންވީ އިސްރާއީލު ކަމަށް ވެސް ނަސްރުﷲ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
