ފޯނާއި މަސްތުވާތަކެތި ވެއްދުމާއި، އޮޅުވާލައިގެން ފައިސާ ފޭރުން ހުއްޓުވުމަށް ކ.މާފުށި ޖަލުގައި ދެ މެޓަލް ޑިޓެކްޓަރު ހަރުކޮށްފިއެވެ.

ދައުލަތުގެ މީޑިއާ، ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި މިކަން ހާމަކުރައްވަމުން، ދާޚިލީ ސަލާމަތާ ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ، މިއާއިއެކު ވަރަށް އަވަހަށް ބޮޑީ ސްކޭން މެޝިނެއްވެސް ޤާއިމްކުރާނެކަމަށެވެ.

ވަޒީރު އިހުސާން ވިދާޅުވީ، ސްކޭމް ކޯލްތައް އެންމެ ގިނައިން ކުރަނީ ޖަލުތަކުން ކަމަށާއި، އެކަންތައްތައް ހުއްޓުވުމަށްޓަކައި ކުރަމުންދާ މަސައްކަތްތަކުގެ ތެރެއިން މިދިޔަ ހަފްތާގެ ތެރޭގައި މާފުށި ޖަލުގައި ދެ މެޓަލް ޑިޓެކްޓަރު ހަރުކޮށްފައިވާ ކަމަށާއި، ކުރިއަށް އޮތް މަހުގެ ތެރޭގައި ހަށިގަނޑު ސްކޭންކުރާ ނުވަތަ ބޮޑީ ސްކޭނިންގ މެޝިނެއް ޤާއިމްކުރުމުގެ މަސައްކަތް ކުރަމުންދާ ކަމަށެވެ.

ޖަލުތެރޭގެ ކޮންމެ ގޮޅިއަކުން ވެސް ފޯނާއި މަސްތުވާތަކެތި ފަދަ އެއްޗެހި ފެންނަމުންދާކަން ފާހަގަކުރައްވަމުން ވަޒީރު ވިދާޅުވީ، އެކަމަށް އަޅަން ޖެހޭ ފިޔަވަޅުތައް ޖަލުތަކުން އަޅަމުންދާ ކަމަށެވެ. އަދި އެކަންތައް ހައްލުވުމުން މުޖުތަމައުގެ ތެރޭގައި ސްކޭމް ކޯލްތައް ކުރާ މީހުންނާއި މެދު ފިޔަވަޅު އެޅުމަށް ބޭންކާއެކުގައި އެއްބަސްވުމެއް ހަދައިގެން ފުލުހުން އެމަސައްކަތް ކުރިއަށްގެންދާ ކަމަށް ވަޒީރު އިހުސާން ވިދާޅުވިއެވެ.

ޖަލުތަކަށް ފޯނާއި މަސްތުވާތަކެތި ވެއްދުމުގެ މައްސަލަތަކަކީ މިހާތަނަށް ވެސް ހައްލުކުރެވިފައިނުވާ މައްސަލައަކަށް ވާއިރު، މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން ބުނީ، ފޯނު ވައްދައިގެން ސްކޭމް ކޯލްކުރާކުރުން ހުއްޓުވުމަށް ހަރުދަނާ ފިޔަވަޅުތަކެއް އަޅަމުން އަންނަކަމަށެވެ.