އެޗު ނޯވ ކޮމްޕެނީ ޕްރައިވެޓް ލިމިޓެޑުގެ ފަރާތުން އިންތިޒާމުކޮށް ރ.އަތޮޅު އިނގުރައިދޫގައި މިހާރު ކުރިއަށްދާ "މައްޔާ ފުޓްސަލް ވާދަ 2024"ގެ ފައިނަލުގައި ވާދަވެރި ކުޅުމަށްފަހު 4-3 ގެ ނަތީޖާއަކުން ހަލަފް އެފްސީ ބަލިކޮށް ސްޓްރީޓް ބްރަދާސް އިން މުބާރާތުގެ ޗެންޕިއަންކަން ހޯދައިފިއެވެ.

ހަލަފް އެފްސީ ފައިނަލުން ޖާގަހޯދީ ސެމީފައިނަލުގައި 6-3 ގެ ނަތީޖާއަކުން ކިފުޅިއަންސް ބަލިކުރުމަށްފަހުއެވެ. އަދި ސްޓްރީޓް ބްރަދާސް ފައިނަލުން ޖާގަހޯދީ ސެމީފައިނަލުގައި ފަސޭހަކަމާއެކު 9-2 ގެ ނަތީޖާއަކުން އަލްގޭ ބަލިކުރުމަށްފަހު އެވެ. މީގެ އިތުރުން މިދެޓީމު ގުރޫޕް ސްޓޭޖުގައި ވާދަކުރި މެޗު 3-1 ގެ ނަތީޖާއަކުން ކާމިޔާބުކޮށްފައި ވަނީ ސްޓްރީޓްސް ބްރަދާސް އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 3-1 ގެ ނަތީޖާއަކުން ސްޓްރީޓް ބްރަދާސް ކުުރީގައި އޮވެގެންނެވެ. އަދި މެޗުގެ ދެވަނަ ހާފުގައި ސްޓްރީޓް ބްރަދާސް އިން އިތުރު ލަނޑެއް ކާމިޔާބުކުރިއިރު، މިހާފުގައި ހަލަފުން ވަނީ ދެލަނޑު ކާމިޔާބުކޮށްފައެވެ.

މީގެ އިތުރުން ދެވަނަ ހާފުގައި ދެޓީމުގެ ފަރާތުން ވަރަށް ފިޒިކަލް ކުޅުމެއް ފެނިގެންދިޔައިރު، ދެޓީމުގެ ދެކުޅުންތެރިއަކަށް ރަތްކާޑުވެސް ދައްކާފައިވެއެވެ. އަދި މިމެޗުގައި ސްޓްރީޓް ބްރަދާސް އަބްދުﷲ ލޫތު ދެލަނޑު ކާމިޔާބުކުރިއިރު، އެޓީމުގެ އަހުސަމް އަލީ އަދި އަހުމަދު އައިހަމް މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފަ އެވެ.

މީގެ އިތުރުން މިމެޗުގައި ހަލަފް އެފްސީގެ އިބްރާހިމް ހާމިދު ދެލަނޑު ކާމިޔާބުކުރިއިރު، އެޓީމުގެޱއަނެއް ލަނޑު ކާމިޔާބުކޮށްދިނީ އިބްރާހިމް ޝަރީފް އެވެ. އަދި ފައިނަލް މެޗުގެ މޮޅު ކުޅުންތެރިއަކަށް ހޮވުނީ ސްޓްރީޓް ބްރަދާސް އަބްދުﷲ ލޫތު އެވެ.

މުބާރާތުގެ ފެއާޕްލޭ ޓީމަކަށް ރެދަން އެފްސީ ހޮވުނުއިރު، އެންމެ މޮޅު ކޯޗަކީ ނަސްރުﷲ މޫސާއެވެ. އަދި މުބާރާތުގެ އެންމެ މޮޅު ފަސް ކުޅުންތެރިންނަކީ އަބްދުﷲ ލޫތް (ސްޓްރީޓް ބްރަދާސް)، ޖުމާން (ސްޓްރީޓް ބްރަދާސް)، އަހުމަދު މާހިމް (ސްޓްރީޓް ބްރަދާސް)، އަހުމަދު މަޝީދު (ހަލަފް އެފްސީ) އަދި އިބްރާހިމް ޝަރީފް (ހަލަފް އެފްސީ) އެވެ.

މީގެ އިތުރުން މުބާރާތުގެ އެންމެ ގިނަ ލަނޑުޖެހި ކުޅުންތެރިއާގެ މަގާމާއި އެންމެ މޮޅު ކުޅުންތެރިއާގެ މަގާމު ހޯދީ ސްޓްރީޓް ބްރަދާސް އަބްދުﷲ ލޫތު އެވެ.

ޗެންޕިއަން ޓީމަށް 25،000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ޖުމްލަ އަށް ޓީމު ބައިވެރިވެފައިވާއިރު، މުބާރާތް ކުރިއަށްދަނީ ބައިވެރިވި އަށް ޓީމު ދެ ގުރޫޕަކަށް ބަހާލައިގެންނެވެ.

މިމުބާރާތުގެ މެއިން ސްޕޮންސަރ އަކީ އަރަކާއެވެ. އަދި ޓައިޓަލް ސްޕޮންސަރ އަކީ އެޗު ނޯވ ކޮމްޕެނީ ޕްރައިވެޓް ލިމިޓެޑެވެ. މީގެއިތުރުން ޕްރިންޓިންގ ޕާޓްނަރ އަކަށް ޕްރިންޓް ލެބް ހަމަޖައްސާފައިވާއިރު، މީޑިއާ ޕާޓްނަރުންނަކީ ސިޑިބަރި އަދި ވޮއިސް ސްޕޯޓްސް އެވެ.