މޫސުމީ ބަދަލުތަކާއި، ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހިމް، ރަސްމީ ދަތުރުފުޅެއްގައި ބޫޓާނަށް  ފުރާވަޑައިގެންފިއެވެ.

މޫސުމީ ބަދަލުތަކާއި، ތިމާވެށްޓާއި ހަކަތައާ ބެހޭ ވުޒާރާއިން ހާމަކުރެއްވި ގޮތުގައި، ވަޒީރު ޠާރިޤް ބޫޓާނަށް ވަޑައިގެންނެވީ، ސައުތު އޭޝިޔާ ކޯޕަރޭޓިވް އެންވަޔަރަމަންޓް ޕްރޮގްރާމް (ސަސެޕް) ގެ 16 ވަނަ ގަވަރނިންގ ކައުންސިލުގެ ބައްދަލުވުމުގައި ބައިވެރިވެވަޑައިގަތުމަށެވެ.

މި ބައްދަލުވުން ބޭއްވުމަށް ހަމަޖެހިފައިވަނީ މި މަހުގެ 24 ވަނަ ދުވަހުން ފެށިގެން 26 ވަނަ ދުވަހުގެ ނިޔަލަށެވެ.

ސައުތު އޭޝިޔާ ކޯޕަރޭޓިވް އެންވަޔަރަމަންޓް ޕްރޮގްރާމް (ސަސެޕް) އަކީ ދެކުނު އޭޝިއާގެ ގައުމުތަކުގެ ސަރުކާރުތަކުން ތިމާވެށި ހިމާޔަތްކުރުމާއި ބެލެހެއްޓުމަށް އަދި ތިމާވެށީގެ މަޝްރޫއުތައް ކުރިއެރުވުމަށް އެހީތެރިވުމަށްޓަކައި 1982 ގައި އެކުލަވާލައި، ހިންގަމުން ގެންދާ ޖަމްއިއްޔާއެކެވެ.

މި ބައްދަލުވުމުގެ ތެރެއިން ސަސެޕްގެ މެމްބަރު ގައުމުތަކުގެ މެދުގައި ތިމާވެށްޓާ ބެހޭ މުހިންމު މަޝްވަރާތަކެއް ކުރެވޭނެ ކަމަށް މޫސުމީ ބަދަލުތަކާއި، ތިމާވެށްޓާއި ހަކަތައާ ބެހޭ ވުޒާރާއިން ވަނީ ހާމަ ކުރައްވާފައެވެ.