ފަލާޙާ ގުޅޭ ގޮތުން ފަތުރަމުން ދާ ވާހަކަތައް ޕީއެންސީއިން ދޮގުކޮށްފިއެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިއަދު ނެރުނު ބަޔާނެއްގަިއ ބުނެފައިވަނީ، އެ ޕާޓީ ގެ ޕާލަމަންޓްރީ ގްރޫޕް ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހުގެ އަބުރުފުޅަށް އަރައިގަނެ ޙަޤީގަތާ ޚިލާފު ދޮގު ވާހަކަތަކެއް މީސްމީޑިޔާގައި ފަތުރަމުން ގެންދާތީ އެކަން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.
އިބްރާހީމް ފަލާހާ ގުޅުވައިގެން، މީސްމީޑިޔާގައި ފަތުރަމުން އަންނަނީ ދެ ފިރިހެނުން އެއްޖިންސުން ގުޅުން ހިންގާ ވީޑިއޯއެކެވެ. އެ ވީޑިއޯއިން ފެންނަ ދެ ފިރިހެނުންގެ ތެރެއިން އެކަކީ ފަލާހު ކަމަށް، މީސްމީޑިޔާގައި މި ވީޑިއޯ ފަތުރަމުން ދާ ފަރާތްތައް ވަނީ ތުހުމަތުކޮށްފައެވެ.
މި ކަމާ ގުޅިގެން، ޕީއެންސީ އިން ބުނެފައިވަނީ، މީސްމީޑިޔާގައި ފަތުރަމުން ގެންދާ ވީޑިޔޯ ނުވަތަ ފޮޓޯގައިވާ ފަރާތަކީ ކޮންގްރެސް ޕާޓީގެ ޕާލަމަންޓްރީ ގްރޫޕްގެ ލީޑަރު އިބްރާހީމް ފަލާޙު ނޫންކަން މީގެ 2 އަހަރު ކުރިން ދިވެހި ފުލުހުންގެ ޚިދުމަތުން ވަނީ ކަށަވަރުކޮށްދީފައި ކަމަށެވެ.
އަދި ޙަޤީގަތާ ޚިލާފު ދޮގު ވާހަކަ ދައްކާ، ފަތުރާ ފިތުނަ އުފައްދަން މަސައްކަތް ކުރާ ފަރާތްތަކުގެ މައްސަލަ ބަލާ ފިޔަވަޅު އެޅުމަށް ޕީއެންސީއިން ވަނީ ފުލުހުންނަށް ގޮވާލާފައެވެ.
Advertisement
This content is created and paid for by advertisers and does not involve Voice Journalists
