މަސްވެރިންނަށް ލިބެންޖެހޭ ފައިސާ ވޭހާވެސް އަވަހަށް ދިނުމަށް ގޮވާލައި ރައްޔިތުންގެ މަޖިލީހުގެ މަރަދޫ ދާއިރާގެ އެމްޑީޕީ މެންބަރު އަހުމަދު ދީދީ ހުށަހެޅި ކުއްލި މައްސަލަ ވެރިކަންކުރާ ޕީއެންސީގެ 66 މެންބަރުންގެ ތާއީދާއެކު މަޖިލީހަށް ބަލައިގެންފިއެވެ.
މަސްވެރިންނަށް ބާނާ މަހުގެ ފައިސާ ނުލިބޭ މައްސަލާގައި، އައްޑޫ މަސްވެރިން މުޒާހަރާވެސް ކުރަމުންދާއިރު، އެ މައްސަލާގައި އިދިކޮޅުގެ ފަރާތުން މަޖިިލީހަށް ކުއްލި މައްސަލައެއް ހުށަހެޅުމަށް ފުރަތަމަ އެޖެންޑާ ކޮށްފައި އޮތީ އިއްޔެ އޮތް 20 ވަނަ ރައްޔިތުންގެ މަޖިލީހުގެ 5 ވަނަ ޖަލްސާއަށެވެ.
ނަމަވެސް މައްސަލަ ހުށަހަޅުއްވި މަރަދޫ ދާއިރާގެ މެންބަރު މަޖިލީހަށް ހާޒިރުވެވަޑައިނުގަތުމުން އިއްޔެ މިމައްސަލަ ކުރިއަށް ގެންދެވޭ ގޮތެއް ނުވިއެވެ.
އެ މައްސަލަ މިއަދު އަލުން މަޖިލީހަށް ހުށަހަޅަން ފުރުސަތު ދީފައިވާއިރު، މައްސަލަ ހުށަހެޅުއްވުމުން އެ މައްސަލަ ބަލައިގަތުމަށް 74 މެންބަރުން ވޯޓު ދީފައުވާއިރު، ބަލައި ނުގަންނަން އެންމެ މެންބަރަކުވެސް ވޯޓް ދީފައެއް ނުވެއެވެ.
އަދި މައްސަލަ ބަލައިގަންނަން ވޯޓްދިން 74 މެންބަރުންގެ ތެރެއިން 66 މެންބްރުންނަކީ ވެރިކަންކުރާ ޕީއެންސީގެ މެންބަރުންކަން ފާހަގަކޮށްލަން ޖެހެއެވެ.
އަހުމަދު ދީދީ ހުށަހެޅުއްވި މައްސަލާގައި އޭނާ ވަނީ، އައްޑޫގައި މުޒާހަރާ ކުރަމުންދާ ފަރާތްތަކުގެ ކަންބޮޑުވުން ހައްލުކޮށް، މަސްވެރިންނަށް ދޭންޖެހޭ ފައިސާ ވީއެންމެ އަވަހަށް ދިނުނަށް ގޮވާލާފައެވެ. އަދި މަސްވެރިންގެ މުޒާހަރާއަށް ފުލުހުން ހުރަސް ނޭޅުމަށްވެސް އާެނާ ވަނީ ގޮވާލާފައެވެ.
Advertisement
This content is created and paid for by advertisers and does not involve Voice Journalists
