ތިން މަސް ފެކްޓްރީއެއްގެ މަސައްކަތް ކުރާ ފަރާތްތައް މި ހަފްތާ ތެރޭ ޗައިނާއިން އަންނާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، އާދިއްތަ ދުވަހުގެ ރޭ ޕީއެންސީގެ ޖަގަހަ، ޕީއެންސީ ހައުސް ހުޅުވުމަށް ބޭއްވި ޖަލްސާގައެވެ.
ޖަލްސާގައި ވާހަކަ ދައްކަވަމުން ވަޒީރު ވިދާޅުވީ ދިވެހިރާއްޖޭގަ މަސް ޕްރޮސެސް ކުރާ ފެކްޓަރީތައް ﷲ އިރާދަފުޅުން ލަސްތަކެއްނުވެ އަޅަން ފެށޭނެ ކަމަށެވެ. އަދި އެ މަނިކުފާނު ބޭނުންފުޅުވަނީ، ރޯ މަހުގެ ގޮތުގައި ކަޅު ބިލަ މަސް ބޭރުކުރުން ހުއްޓާލާ، ރާއްޖޭގައި މަސް ބަންދުކުރަން ކަމަށެވެ.
"ދިވެހިރާއްޖޭގަ އަޅުގަނޑުމެން ބޭނުންވަނީ ރޯ މަހުގެ ގޮތުގަ، ފްރޯޒަން ފިޝްގެ ގޮތުގަ މި ބޭރު ކުރެވޭ މަސް ބޭރުކުރުން، މަހޭ މި ދަންނަވަނީ ކަޅު ބިލަ މަސް ބޭރުކުރުން ހުއްޓާލަން. އޭގެ މާނައަކީ މި ތަނުގަ، ދިވެހިރާއްޖެއަށް ބާނާ ނުވަތަ މިފްކޯއަށް މި ނަގާ 70 ވަރަކަށް ހާސް ޓަނުގެ މަސް އަޅުގަނޑުމެން ބޭނުންވަނީ މި ޤައުމުގަ ޕްރޮސެސް ކުރެވޭނެ ގޮތް ހަދަން. މި ޤައުމުގަ ދަޅަށް ލެވޭނެ ގޮތް ހަދަން. މި ޤައުމުގަ ޕެކެޓަށް ލެވޭނެ ގޮތް ހަދަން."
ވަޒީރު ޝިޔާމް ވިދާޅުވިއެވެ.
ވަޒީރު އިިތުރަށް ވިދާޅުވީ، މަސްވެރިކަމުގެ ސިނާޢަތް ކުރިއަރާ، ރަނގަޅު ޢާމްދަނީއެއް ލިބޭނީ، ރާއްޖޭގައި މަސް ބަންދުކުރުމުން ކަމަށެވެ.
"އެއިރުން މަސްވެރިންނަށް ރަނގަޅު ޢާމްދަނީއެއް ލިބޭނީ. އެއިރުން މަސްވެރި ސިނާޢަތަށް ރަނގަޅު ޢާމްދަނީއެއް ލިބޭނީ. އެ މަސައްކަތް އަޅުގަނޑުމެން މި ކުރަނީ. "
ވަޒީރު ވިދާޅުވިއެވެ.
އެ މަސައްކަތް ކުރުމުގެ ގޮތުން ރާއްޖޭގެ ތިން ރަށެއްގައި މަސް ފެކްޓަރީތައް އެޅުމުގެ މަސައްކަތް ކުރުމަށް ޗައިނާއިން، އެ މަސައްކަތް ކުރާނެ ފަރާތްތައް އަންނާނެކަން ވަޒީރު ވަނީ ހާމަ ކުރައްވާފައެވެ. އެ ގޮތުން އެ ފަރާތްތައް އައިސް އެޅުމުގެ މަސައްކަތް ކުރަން ހަމަޖެހިފައިވަނީ، ފިޔޮރީ، ފ.ނިލަންދޫ، އަދި ފެލިވަރުގައެވެ.
"އިރާދަ ކުރެއްވިއްޔާ މި ހަފްތާވެސް އެބަ އާދެ ޗައިނާއިން ދިވެހިރާއްޖޭގަ ތިން ފެކްޓްރީގެ މަސައްކަތް ކުރާ ފަރާތްތައް. އިރާދަ ކުރެއްވިއްޔާ މި ހަފްތާ އެބޭފުޅުން އެބަ ވަޑައިގަންނަވާ. ވަޑައިގެން އެ ތިން ފެކްޓްރީ. އެއީ ފިޔޮރީއާ ފ.އަތޮޅު ނިލަންދޫ އާ ފެލިވަރު ގަ އަޅާ ޕްރޮސެސިން ފެކްޓްރީތައް އެޅުމުގެ މަސައްކަތް އެ ބޭފުޅުން ކުރާނީ"
ވަޒީރު ޝިޔާމް ވިދާޅުވިއެވެ.
މީގެ އިތުރުން ދިވެހި ރާއްޖޭގަ ކޯލްޑް ސްޓޯރޭޖަށް އޮތް ދަތިކަން ފާހަަގަކުރައްވާ، ވަޒީރު ވިދާޅުވީ، މި މައްސަލަ ހައްލުކުރުމަށް ޓަކައިވެސް ކުރަންހުރި މަސައްކަތްތައް ފަށާނެކަމަށެވެ. އެގޮތުން މ.އަތޮޅު މުލަކުގެ ކޯލްޑް ސްޓޯރޭޖާ ކޫއްޑޫގެ ކޯލްޑް ސްޓޯރޭޖް އެކްސްޕެންޝަންގެ މަސައްކަތަށް ބޭނުންވާ ފައިސާ، ޢީދު ގެ ތެރޭގަ ސަޢުދީ ޢަރަބިއްޔާއިން އެޕްރޫވް ކުރައްވާފައިވާކަންވެސް ވަޒީރު ފާހަގަ ކުރެއްވިއެވެ.
މީގެ އިތުރުންވެސް ޖަލްސާގައި ވާހަކަ ދައްކަވަމުން ވަޒީރު ވަނީ، ކުރިއަށް އޮތް ދޮޅު އަހަރު ދުވަހުގެ ތެރޭގަ މަސްވެރިންގެ ތަރައްޤީއަށް ކުރަން ހުރި ކަންކަން ކޮށް ނިންމާނެ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
