މިއަދު ނިޔާވި މަޝްހޫރު ފުޓުބޯޅަ ތަރި މުޙައްމަދު ޢާރިފު (ބަކާ) އެންމެ ފަހުން އެދިލެއްވީ ކިޔާލާނެ ރަގަޅު ދުޢާ ކޮޅެއް ފޮނުއްވުމަށްކަމަށް ޝައިޚް ޑރ. ޢަލީ ޒާހިރު ބިން ސަޢީދު ޤާސިމް ވިދާޅުވެއްޖެއެވެ.
ޑރ. ޢަލީ ޒާހިރު މިއަދު ފޭސްބުކުގައި ހިއްސާ ކުރެއްވި ޕޯސްޓެއްގައި ވިދާޅުވީ، މުޙައްމަދު ޢާރިފަކީ ދީނީ ކަންކަމަށް ފަރުވާތެރިވި ވަރަށް ގާތް އަޚެއްކަމަށެވެ.
އަދި ބަކާ އެންމެ ފަހުން ޝައިޚް ގާތުން އެދިލެއްވީ، ރަނގަޅު ދުޢާ ކޮޅެއް ފޮނުވުމަށް ކަން ފާހަގަ ކުރައްވާ ޑރ. ޢަލީ ޒާހިރު ވަނީ، ބަކާ އެންމެ ފަހުން ފޮނުވާފައިވާ މެސެޖުވެސް ހިއްސާކުރައްވާފައެވެ. އެ މެސެޖުގައި ބަކާ ބުނެފައިވަނީ "ޝައިޚް، ދުޢާ ފޮތް ފޮނުވާލަ ދެއްޗޭ" އެވެ.
"އެންމެ ފަހުން ވާހަކަ ދައްކާ ލެވުނީ ޙައްޖުގެ އަޅުކަމުގައި ހުންނަވައި ފޯނުން ގުޅުއްވާލެއްވީމަ. އެދިލެއްވީ ކިޔާލާނެ ރަގަޅު ދުޢާ ކޮޅެއް ފޮނުއްވުމަށް. 100 ދުޢާ އެކުލެވޭ ދުޢާ ފޮތެއް ފޮނުވާލަދިނިން."
ޑރ. ޢަލީ ޒާހިރު ވިދާޅުވިއެވެ.
ޢުމުރުން 38 އަހަރުގެ ބަކާ ނިޔާވެފައިވަނީ، ޙައްޖުގެ މަތިވެރި އަޅުކަން އަދާކުރުމަށް ފަހު، ރާއްޖެއަށް އައިތާ މާ ގިނަ ދުވަސްތަކެއް ނުވަނީސް، ޙާލު ދެރަވެ އައިސީޔޫގައި ފަރުވާ ދެމުންދަނިކޮށް މިއަދުގެ ވަގުތެއްގައެވެ. ބަކާ ނިޔާވެފައި ވަނީ ނުރައްކާތެރި ބައްޔެއް ކަމަށްވާ އިންވޭސިވް މެނިންގޯކޮކަލް ޖެހިގެންނެވެ.
Advertisement
This content is created and paid for by advertisers and does not involve Voice Journalists
