އިންވޭސިވް މެނިންގޯކޮކަލް ގެ ކޭސްއެއް ފެނުމާ ގުޅިގެން ކޮންޓެކްޓް ޓްރޭސިންގް ހަދަން ފަށާފައިވާކަމަށް އެޗްޕީއޭ އިން ބުނެފިއެވެ. 

ހެލްތު ޕްރޮޓެކްޝަން އެޖެންސީ (އެޗްޕީއޭ)ބ އިން މީސްމީޑިޔާގައި ކުރި ޕޯސްޓެއްގައި ބުނެފައިވަނީ އިންވޭސިވް މެނިންގޯކޮކަލް ބަލީގެ ކޭހެއް ފެނުމާ ގުޅިގެން ކަމާ ބެހޭ މައުލޫމާތު އެއްކުރަން ފަށާފައިވާކަމަށެވެ.

އަދި ކޮންޓެކްޓް ޓްރޭސިންގް ހަދާ، ކޮންޓެކްޓްވީ ފަރާތްތަކަށް މައުލޫމާތު ދީ، ކޮންޓެކްޓުންނަށް ބަލިން ރައްކާތެރިވުމަށްދޭ ޕްރޮފައިލެކްޓިކް ބޭސް ދޭން ފަށާފައިވާކަމަށްވެސް އެޗްޕީއޭއިން ބުނެއެވެ. 

Advertisement

އެޗްޕީއޭއިން އިތުރަށް ހާމަ ކުރެއްވި ގޮތުގައި، 'ކްލޯޒް ކޮންޓެކްޓް' އެއް ކަމުގައި ބެލެވޭނީ، ބަލި މީހުންނާއި އެއް ގެއެއްގައި ދިރިއުޅޭ މީހުންނާއި، ބަލި މީހާ އާއެކު މަތިންދާ ބޯޓުގައި ނުވަތަ ބަހުގައި ވަރަށް ގިނަ އިރު ދަތުރުކޮށްފައިވާ މީހުންނާއި ބަލި މީހާގެ ކުޅުފަދަ، ނޭވާލާ ނިޒާމުން އުފެދޭ ދިޔައަކަށް ހުށަހެޅިފައިވާ މީހުންނެވެ.

އިންވޭސިވް މެނިންގޯކޮކަލް ފެނިފައިވަނީ، މަޝްހޫރު ފުޓުބޯޅަކުޅުންތެރިޔާ މުޙައްމަދު ޢާރިފު (ބަކާ) ގެ ގައިންނެވެ. ބަކާ ވަނީ، ޙައްޖުގެ މާތް އަޅުކަން އަދާ ކުރުމަށްފަހު އެނބުރި އައިފަހުން، ކުއްލިއަކަށް، ޙާލު ދެރަވެ، އައިސީޔޫގައި ފަރުވާ ދެމުން ދަނިކޮށް މިއަދުގެ ވަގުތެއްގައި ނިޔާވެފައެވެ. 

މައިބަދައާއި ސިކުނޑިއަށް ގެއްލުންވާ، އިންވޭސިވް މެނިންގޯކޮކަލް އަކީ ބެކްޓީރިއާއެއްގެ ސަބަބުން ޖެހޭ ސީރިއަސް އިންފެކްޝަނެކެވެ. މި ބަލީގެ ސަބަބުން، ގުނަވަންތައް ފެއިލްވުމަށްވެސް މަގުފަހިކޮށްދެއެވެ. 

މިބައްޔަކީ ރާއްޖެއިން މީގެ ކުރިންވެސް ފެނިފަިވާ ބައްޔެކެވެ.