ދުނިޔޭގެ މަޝްހޫރު ކްރެޑިޓް ރޭޓިން އެޖެންސީ ފިޗް އިން ރާއްޖޭގެ ރޭޓިން ދަށްކޮށްފިއެވެ.
ވޭތުވެ ދިޔަ އަހަރު 'ބީ މައިނަސް' ގައި ރާއްޖެ ރޭޓު ކުރުމަށްފަހު، މިއަދު ފިޗް އިން ވަނީ، މި އަހަރުގެ ރާއްޖޭގެ ރޭޓިން 'ސީސީސީ ޕްލަސް' އަކަށް ދަށްކޮށްފައެވެ.
ފިޗް އިން ރާއްޖޭގެ ރޭޓިން ދަށްކޮށްފައިވަނީ، ރާއްޖޭގެ މާލީ ޙާލަތަށް ރިޢާޔަތްކޮށްފައެވެ. އެގޮތުން ރާއްޖޭގެ ފޮރިން ރިޒާވް ވަރަށް ބޮޑަށް ދަށްވެ، ޑޮލަރުގެ ތާށިކަމާއެކު، ރާއްޖޭގެ ދަރަނި އިތުރުވެފައިވާކަން ފިޗް އިން ވަނީ ފާހަގަކޮށްފައެވެ.
ފިޗް އިން ލަފާ ކުރާ ގޮތުގައި، އަންނަ އަހަރުވެސް ރާއްޖޭގެ މާލީ ޙާލަތު އޮންނާނީ ކަންބޮޑުވާން ޖެހޭ ފަދަ ޙާލަތެއްގައެވެ. އެގޮތުން، 2026 ވަނަ އަހަރު ނިމޭއިރު ދަރަނި ވެސް އިތުރަށް ވަރަށް ބޮޑުތަން މައްޗަށް ދާނެކަމަށް ފިޗް އިން ލަފާކުރެއެވެ.
ފިޗް އިން ނެރުނު ބަޔާނުގައި ބުނެފައިވަނީ، ރާއްޖޭގެ މާލީ ޙާލަތު އަދު އޮތީ ނާޒުކު ޙާލަތެއްގައި ނަމަވެސް، އެކަށީގެންވާ ފިޔަވަޅުތަކެއް އެޅިއްޖެ ނަމަ، ދަރަނި ކުޑަ ކުރެވިދާނެ ކަމަށެވެ. އަދި ގޮންޖެހުން ތަކެއް ދިމާވި ނަމަވެސް މިހާރުގެ ސަރުކާރުން، ރާއްޖޭގެ މާލީ ޙާލަތު ރަނގަޅު ކުރުމަށް ރަނގަޅު ފިޔަވަޅުތަކެއް އަޅާނެ ކަމަށް ބެލެވޭ ކަމަށްވެސް ފިޗް އިން ބުނެއެވެ.
Advertisement
This content is created and paid for by advertisers and does not involve Voice Journalists
