އެމްޑީޕީ ބަޖެޓު ފާސްކޮށްފައި އޮތީ މި ސަރުކާރުގައި މަރުތަޅު އެޅުވޭ ގޮތަށްކަމަށް ފޭދޫ ދާއިރާގެ ކުރީގެ މެންބަރު މުޙައްމަދު ނިހާދު ވިދާޅުވެއްޖެއެވެ. 

މިރޭ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބޭއްވި ހަރުގެ ޖަލްސާގައި ވާހަކަ ދައްކަވަމުން ނިހާދު ވިދާޅުވީ 19 ވަނަ މަޖިލީހުން، މި ސަރުކާރު ހިންގުމަށް ހުރަސް އެޅުމުގެ ގޮތުން ގިނަ ކަންތައްތަކެއް ކުރި ކަމަށެވެ.

އެގޮތުން ރައްޔިތުންގެ މަޖިލީހުގެ ތެރެއިން މަސައްކަތް ކުރަމުން ދިޔައީ ބަޣާވާތަކުން ވިޔަސް، މި ސަރުކާރު ވައްޓާލަން ކަމަށާއި، އެކަން ކުރުމަށް މަޖިލީހުގެ ޢާންމު ކޮމިޓީގައި ތިއްބެވި ބޭފުޅުން ބަދަލުކޮށް، އެ ބޭފުޅުން ބޭނުންވާނެ ގޮތަކަށް ވޯޓު ދެއްވާނެ ބޭފުޅުން އެ ކޮމިޓީއަށް ލީ ކަމަށް ނިހާދު ވިދާޅުވިއެވެ. 

އަދި އެއަށް ފަހު މުޅި މަޖިލީހުގެ ޤަވާއިދު ބަދަލުކޮށް މަޖިލީހުގެ ޗުއްޓީ ފަނަރަ ދުވަހަށް އިތުރުކޮށް، ރައްޔިތުންގެ މަޖިލިސް ބޭނުންކޮށްގެން މިއަދު އިންތިޚާބު ވެފައިވާ ސަރުކާރަކީ އިތުބާރު ނެތް ކަމުގެ ސަރުކާރެއް ކަމަށް ނިންމަން މަސައްކަތް ކުރި ކަމަށްވެސް ނިހާދު ތުހުމަތު ކުރެއްވިއެވެ.

ނިހާދު އިތުރަށް ވިދާޅުވީ، 19 ވަނަ މަޖިލީހުން ބަޖެޓު ފާސްކޮށްފައި އޮތީ އެއްވެސް ޕްރޮޖެކްޓެއް ހިންގޭނެގޮތަކަށް ނޫން ކަމަށެވެ. އަދި އެއިރުގެ މަޖިލީހުން އެޅި ދަތިކުރުމުގެ ފިޔަވަޅުތައް ޔައުމިއްޔާ ބަލައިލުމުންވެސް ހާމަ ވާނެ ކަމަށެވެ.

އެއިރުގެ ބަޖެޓު ކޮމިޓީއިން ފާސްކުރި ބަޖެޓުގެ ސަބަބުން ގިނަ ދަތިތަކެއް ދިމާވާކަން ހާމަ ކުރައްވާ، ނިހާދު ވިދާޅުވީ މިއަދު އުނދަގޫތައް ހުންނާނެކަމަށާއި، އެހެން ނަމަވެސް މި ސަރުކާރުން ދަނީ، މަޖިލީހުގެ ތެރެއިން މިކަންކަން ޙައްލުކޮށް ރައްޔިތުންނަށް ބޭނުންވާ ޚިދުމަތްތައް ފޯރުކޯށްދޭން މަސައްކަތް ކުރަމުން ކަމަށެވެ. 

މީގެ އިތުރުން ނިހާދު ވަނީ، ކުރީގެ ސަރުކާރުން ޚާއްސަކޮށް އައްޑޫގެ ރައްޔިތުންނަށް ވަރަށް ބޮޑަށް އިހުމާލު ވެފައިވާ ކަމަށް ވިދާޅުވެފައެވެ. 

އެގޮތުން އައްޑޫ ސިޓީގެ ކަރަންޓު ވިއުގަ ހުރީ "މާދަމާވެސް އަލިފާން ރޯވެދާނެ" ފަދަ ޙާލެއްގައި ކަަމަށް ނިހާދު ސިފަ ކުރެއްވިއެވެ. އަދި ކަރަންޓު ވިއުގަ ރަނގަޅު ކުރުމުގެ ނަމުގައި 5 އަހަރު ވަންދެން މަސައްކަތް ކުރި ނަމަވެސް މައްސަލަތަކަށް ޙައްލު ނުލިބޭ ކަމަށާއި، 2019 ވަނަ އަހަރު ހަވާލުކުރި މަގު ހެދުމުގެ ޕްރޮޖެކްޓެއް އަދިވެސް ނުނިމޭ ކަން ނިހާދު ފާހަގަ ކުރެއްވިއެވެ. 

ކުރީގެ ސަރުކާރުން ވަނީ، އައްޑޫ ރައްޔިތުންނަށް ވަރަށް ބޮޑަށް އޮޅުވާލާފައި ކަމަށްވެސް ޖަލްސާގަައި ވާހަކަ ދައްކަވަމުން ނިހާދު ވިދާޅުވިއެވެ. އެގޮތުން އައްޑޫ ސިޓީ ހުޅުމީދޫ ފަޅުތެރޭގައި ދެ ރަށް ހިއްކާނަމޭ ބުނެ އޮޅުވާލި ކަމަށާއި، އައްޑޫ ގެ ޕޯޓާއި، ފޭދޫ ބަނދަރާއި، މިފްކޯ ބަނދަރު ތަރައްޤީ ކޮށްދޭނަމޭ ބުނެވެސް އޮޅުވާލީ ކަމަށް ނިހާދު ވިދާޅުވިއެވެ.

މީގެ އިތުރުން ނިހާދު ވަނީ، އައްޑޫ ސިޓީއަށް މި ސަރުކާރުން ވެފައިވާ ވަޢުދުތައް ފުއްދާނެ ކަމަށް ވިދާޅުވެ، އައްޑޫ ސިޓީގައި ބްރިޖު އަޅާނެ ކަމަށާއި، އައްޑޫ ސިޓީއަށް ބޯހިޔާވަހިކަން، ގެނެސްދޭނެ ކަމަށާއި، މަސް ފެކްޓްރީ ތަރައްޤީ ކުރާނެ ކަންވެސް ފާހަގަ ކުރައްވާފައެވެ.