އެންވަޔަރަމަންޓުގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ހިމެނޭހެން އިތުރު ދެ މީހަކު ހައްޔަރުކޮށް ތަހުގީގުކުރަމުންދަނީ ރައީސް މުހައްމަދު މުއިއްޒުގެ ދެކަނބަލުންނަށް ސިހުރު ހެދި މައްސަލައެއް ކަމަށް ހާމަވެއްޖެއެވެ.
ފުލުހުން ތަހުގީގު ކުރަމުންދާ މައްސަލަ އަކާ ގުޅިގެން ޝަމްނާޒް އާއި އިތުރު ދެ މީހަކު ޖޫން 23 ވަނަ ދުވަހު ހައްޔަރު ކޮށްފައިވާ ކަމަށާއި، އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، 7 ދުވަހަށް ބަންދު ކުރުމަށް އަމުރު ކޮށްފައިވާ ކަމަށް ފުލުހުން ވަނީ ބުނެފައެވެ.
ހޯމް މިނިސްޓްރީން ރޭ އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުުމުގައި ނޫސްވެރިއަކު ވަނީ، ޝަމްނާޒް މެންނަށް ތުހުމަތު ކުރެވެނީ، “ރައީސުލްޖުމްހޫރިއްޔާ އާއި، ރައީސުލްޖުމްހޫރިއްޔާގެ ޢާއިލާއަށް ސިހުރު ހެދި ކަމުގެ މައްސަލައެއްތޯ، ތަހުގީގު ކުރެވެނީ އެކަމަށްތޯ އާއި ތުހުމަތު ކުރެވެނީ އެކަމަށްތޯ” ސުވާލު ކޮށްފައެވެ.
އެ ސުވާލަށް ޖަވާބުދެއްވަމުން އެސިސްޓެންޓް ކޮމިޝަނާ އޮފް ޕޮލިސް އަބްދުالله ޝަރީފް ވަނީ ތަހުގީގު ކުރަމުންދަނީ “އެފަދަ” މައްސަލައެއްކަން ޔަގީންކޮށްދެއްވާފަ އެވެ.
"މީޑިއާއަށް ވެސް އެނގިފައިވާ ގޮތަށް އަޅުގަނޑުމެން ތަހުގީގު ކުރަމުން މިގެންދަނީ ހަމަ އެފަދަ ތުހުމަތެއް،" ޝަރީފް ވިދާޅުވި އެވެ.
ޝަރީފް އިތުރަށް ވިދާޅުވީ، އެ މައްސަލަ އަކީ ތަހުގީގީ މަރުހަލާގައި އޮތް މައްސަލައަކަށްވުމުން އެކަމާ ގުޅޭ އިތުރު ތަފްސީލު މިވަގުތަށް ހާމަކުރެވެން ނެތް ކަމަށާ ތަހުގީގު ފުރިހަމަކުރެވުމުން ހާމަކުރެވެން ހުރި މައުލޫމާތެއް ހާމަކުރައްވާނެ ކަމަށެވެ.
ސިހުރު ހެދި މައްސަލައާއި ގުޅިގެން ޝަމްނާޒް މިހާރު ވަނީ މަގާމުން ވަކިކޮށްފައެވެ. އަދި އޭނާގެ ކުރީގެ ފިރިކަލުން ރަމީޒްވެސް ރައީސް އޮފީހުގެ މިނިސްޓަރު ކަމުން ސަސްޕެންޑް ކޮށްފައިވާ ކަމަށް އެ އޮފީހުން ވަނީ މައުލޫމާތު ދީފައެވެ.
Advertisement
This content is created and paid for by advertisers and does not involve Voice Journalists
