ފިޗް ރޭޓިންގސް އިން ދިވެހިރާއްޖޭގެ ކްރެޑިޓް ރޭޓިން ދަށްކޮށްފައިވަނީ ފާއިތުވި އަހަރުތަކުގައި ޚަރަދު ކުޑަ ނުކުރުމުގެ ސަބަބުން ކަމަށް މާލީ ވުޒާރާއިން ބުނެފި އެވެ.

މާލީ ވުޒާރާއިން މި ފަދައިން ބުނެފައިވަނީ، ދައުލަތުގެ މާލީ ޙާލަތާއި ފިސްކަލް ހިރާސްތަކާ ގުޅޭގޮތުން ކުރީގެ ފިނޭންސް މިނިސްޓަރު އިބްރާހިމް އަމީރު ދެއްކެވި ވާހަކަފުޅާއި ގުޅިގެން އިއްޔެ ނެރުނު ނޫސްބަޔާނެއްގައެވެ.

އެ ބަޔާނުގައި ބުނެފައިވަނީ، ރާއްޖޭގެ އިޤްތިސާދަކީ ކޯވިޑް-19ގެ ބަލިމަޑުކަމަށްފަހު އެންމެ އަވަހަށް އިޔާދަވި އެއް އިޤްތިސާދު ކަމަށާއި, މިއަހަރާއި މެދު ރާސްތާގައިވެސް ރާއްޖޭގެ އިޤްތިސާދު ހަލުވިކަމާއެކު ކުރިއަރާނެކަމަށް އަންދާޒާ ކުރެވޭ ކަމަށެވެ.

ނަމަވެސް އޭރުވެސް ދައުލަތުގެ މާލިއްޔާއަށް ހިރާސްތަކެއް ހުރުމުން، މާލީ ވުޒާރާއިން 2022 ވަނަ އަހަރާއި، 2023 ވަނަ އަހަރުގެ ތެރޭގައި ފިސްކަލް ހިރާސްތައް ކުޑަކުރުމަށް އަޅަންޖެހޭ ފިޔަވަޅުތައް ފިސްކަލް ސްޓްރެޓެޖީ ބަޔާންތަކާއި ބަޖެޓް ފޮތްތަކުގައި ހުށަހަޅާފައިވާކަމަށް ވެސް މާލީ ވުޒާރާގެ ބަޔާނުގައި ބުނެފައިވެއެވެ.

އެގޮތުން 2022 ވަނަ އަހަރު ހުށަހަޅައިގެން 2023 ވަނަ އަހަރުން ފެށިގެން ޖީއެސްޓީގެ ރޭޓުތަކަށް ގެނެސްފައިވާ ބަދަލުތަކަކީ ހެޔޮ ބަދަލުތަކެއް ނަމަވެސް، މިދިޔަ އަހރުގެ ނޮވެމްބަރު މަހުގެ 17 ވަނަ ދުވަހުގެ ނިޔަލަށްވެސް، ކޮވިޑް-19 ގެ ޙާލަތުން އަރައިގަނެވުނުއިރު ފާހަގަކުރެވުނު ފިސްކަލް ހިރާސްތައް ކުޑަކުރުމަށް، ޚަރަދުކުޑަކުރުމުގެ ސިޔާސަތުތައް ތަންފީޒު ކޮށްފައިނުވާކަމަށް މާލީ ވުޒާރާގެ ބަޔާނުގައި ވެއެވެ.

މި ކަމުގެ ސަބަބުން ދައުލަތުގެ ޚަރަދުތައް ޢާމްދަނީއާ ނުބައްދަލު މިންވަރަށް އިތުރުވެ، އެ ޑެފިސިޓް ފޫބެއްދުމަށް ކޮންމެ އަހަރަކުވެސް ނަގަން ޖެހޭ ދަރަނީގެ އަދަދު އިތުރުވެފައިވާ ކަމަށާއި، ނަތީޖާއެއްގެ ގޮތުން ފިސްކަލް އަދި ދަރަނީގެ ދެމެހެއްޓެނިވިކަން ގެއްލިފައިވާއިރު މެދުރާސްތާގައި ދަރަނި އަދާނުކުރެވުމުގެ ހިރާސް އިންތިހާއަށް އުފުލިފައިވާކަން އައިއެމްއެފް އިން 2022 ވަނަ އަހަރު ނެރުނު ރިޕޯޓްގައިވެސް ފާހަގަކޮށްފައިވާ ކަމަށް މާލީ ވުޒާރާއިން ވަނީ ބުނެފައެވެ.

މާލީ ވުޒާރާގެ ބަޔާނުގައި އިތުރަށް ބުނެފައި ވަނީ، މި އަހަރުގެ ބަޖެޓު ފޮތުގައި އަހަރުގެ މެދުތެރެއިން ފެށިގެން މާލީ އިސްލާހުތަކެއް ތަންފީޒުކޮށްގެން ޚަރަދުތައް ކުޑަކުރާނެ ކަމަށް ބަޔާންކޮށް، ފްރޭމްވަރކެއް ތައްޔާރުކޮށްފައިވި ނަމަވެސް މިދިޔަ ސަރުކާރު ނިމުނުއިރުވެސް އެކަންކަން ކުރާނެ ގޮތުގެ ތަފްސީލީ އެކްޝަން ޕްލޭނެއް އެކުލަވާލާފައިނުވާކަމަށެވެ.

އެހެންނަމަވެސް އަދުގެ ސަރުކާރުން އަންނަނީ، މި އިސްލާހުތަކާ ގުޅޭ ތަފްސީލީ ޓެކްނިކަލް މަސައްކަތްތައް ނިންމައި ޚަރަދު ކުޑަކުރުމަށް އަޅަންޖެހޭ ފިޔަވަޅުތައް ތަންފީޒުކުރުމަށް ތައްޔާރުވަމުންކަން ބަޔާނުގައި ފާހަގަކޮށްފައި ވެއެވެ.

އަދި ރާއްޖޭގެ މާލީ ޙާލަތު ރަނގަޅުކުރުމަށް އެ ވުޒާރާއިން ބުރަ މަސައްކަތްތަކެއް ކުރަމުން ދާ މި ދަނޑިވަޅުގައި، ކުރީގެ ވަޒީރު، ދައުލަތުގެ މާލީ ޙާލަތާ މެދު، ޙަޤީގަތް އޮޅޭގޮތަށް އަދި ވުޒާރާ ބަދުނާމު ވާގޮތަށް ވާހަކަދައްކަވާފައިވާތީ ހިތާމަކުރާކަންވެސް ފާހަގަކޮށް، ވުޒާރާއިން ވަނީ މިހާރު ކުރަމުންދާ އިސްލާހީ މަސައްކަތްތަކަކީ ރައްޔިތުންގެ މަސްލަހަތު ހިމެނޭ، އަދި މުސްތަގުބަލާ ގުޅޭ ކަމަކަށްވާތީ އެ މަސައްކަތްތަކުގައި ހުރިހާ ފަރާތްތަކުންވެސް ފުރިހަމަ އެއްބާރުލުން ދިނުމަށް އެދިލައްވާފައެވެ.