މާފުށީ ޖަލަށް ޤަވާއިދާ ޚިލާފަށް ވައްދާފައިވާ މަނާ ތަކެތި އަތުލައިގަތުމަށް ކުރިއަށްދާ އޮޕަރޭޝަން ބެއްލެވުމަށް ދާޚިލީ ވަޒީރު އަލީ އިޙްސާން މިއަދު ހެނދުނު މާފުށީ ޖަލަށް ޒިޔާރަތްކުރައްވައިފިއެވެ.
ދާޚިލީ ސަލާމަތާއި ފަންނިއްޔާތާ ބެހޭ ވުޒާރާއިން މިއަދު އެކްސްގައި ކުރެއްވި ޕޯސްޓެއްގައި ބުނެފައިވަނީ، ޤަވާއިދާ ހިލާފަށް މާފުށި ޖަލަށް ވައްދާފައިވާ މަނާ ތަކެތި އަތުލައިގަތުމަށް، ކަރެކްޝަނާއި، ފުލުހުންނާއި އެމްއެންޑީއެފް އިން ގުޅިގެން ކުރިއަށް ގެންދާ އޮޕެރޭޝަން ގެ މަސައްކަތް ކުރިއަށް ދާގޮތް ބައްލަވައިލެއްވުމަށް، ދާޚިލީ ވަޒީރު އަލީ އިޙްސާން މާފުށީ ޖަލަށް ޒިޔާރާތް ކުރައްވާފައިވާ ކަމަށެވެ.
ދާޚިލީ ވަޒީރުގެ މި ޒިޔާރަތުގައި ކޮމިޝަނަރ އޮފް ޕޮލިސް އަދި ކޮމިޝަނަރ އޮފް ޕްރިޒަންސްގެ އިތުރުން ޕޮލިސް އަދި ކަރެކްޝަންގެ އިސްކޮށް މަސައްކަތްކުރައްވާ ގިނަ އޮފިސަރުން ބައިވެރިވެވަޑައިގެންނެވިއެވެ.
މާފުށީ ޖަލުގައި ކުރިއަށް ގެންދާ އޮޕަރޭޝަނަކީ، ޤަވާއިދާ ޚިލާފަށް ޖަލަށް ވައްދާފައިވާ މަނާ ތަކެތި އަތުލައިގަތުމަށްމޯލްޑިވްސް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި މޯލްޑިވްސް ނޭޝަނަލް ޑިފެންސް ފޯސް ގުޅިގެން ކުރިއަށްގެންދާ އޮޕަރޭޝަނެކެވެ.
Advertisement
This content is created and paid for by advertisers and does not involve Voice Journalists
