ހުޅުމާލެ ޕްރިޒަންގައި މަސައްކަތްކުރާ އޮފިސަރަކަށް ހަމަލާ ދޭން މަސައްކަތްކުރި ދެ މީހުން ހައްޔަރުކޮށްފިއެވެ.

ފުލުހުން މައުލޫމާތު ދެއްވި ގޮތުގައި، ޖަލު އޮފިސަރަކަށް ހަމަލާ ދޭން ބަޔަކު މަސައްކަތް ކޮށްފައިވަނީ ޖޫން 11 ވަނަ ދުވަހުއެވެ.

އެގޮތުން، ޕްރިޒަން އޮފިސަރު ސައިކަލުގައި ދުއްވާފައި ދަނިކޮށް، އޭނާގެ ފަހަތުން ދެ މީހުން ސައިކަލެއްގައި އައިސް، ސައިކަލު ފަހަތުގައި އިން މީހާގެ އަތުގައި އޮތް މަރުތޭލަކުން ޕްރިޒަން އޮފިސަރުގެ ބޮލުގައި ޖަހައި މާރާމާރީ ހިންގަން އުޅުނު ކަމަށް ފުލުހުން ބުނެއެވެ.

ފުލުހުން އިތުރަށް މައުލޫމާތު ދެއްވި ގޮތުގައި، ފުލުހުންގެ ތަޙުޤީޤަށް، ހާދިސާ ހިނގި ސަރަހައްދުގެ ކެމެރާ ފުޓޭޖްތައް ބެލުމުން، ހުޅުމާލެ ޕްރިޒަން ސަރަހައްދުގައި ސައިކަލެއްގައި ހެލްމެޓް އަޅައިގެން ތިބި ދެ މީހަކު ޖަލުން ނުކުންނަ މުވައްޒަފުންނަށް ފާރަލަމުން ދިޔަ މަންޒަރު ފެނިފައިވެއެވެ.

މި މައްސަލައާ ގުޅިގެން ހައްޔަރުކޮށްފައިވަނީ އަޙްމަދު ޢިޔާޒް (24އ، ރ. އިނގުރައިދޫ / މިރިހިމާގެ) އާއި އަޙްމަދު ރަބީޢު (26އ، ގއ. މާމެންދޫ / ގްލޭނޫރަންމާގެ) އެވެ.

ޢިޔާޒް ހައްޔަރުކޮށްފައިވަނީ ފިލައިގެން ގޮސް ހއ. ބާރަށުގައި ހުއްޓާ ޖޫން 14 ވަނަ ދުވަހުއެވެ. އަދި ރަބީޢު ހައްޔަރުކޮށްފައިވަނީ މާލޭގެ ގެސްޓް ހައުސްއެއްގައި ފިލައިގެން އުޅެނިކޮށް ޖޫން 20 ވަނަ ދުވަހުއެވެ. ދެމީހުންވެސް ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.

މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ވަނީ ތަޙުޤީޤު މަރުޙަލާ ނިމެންދެން ބަންދުކުރުމަށް އަމުރުކޮށްފައެވެ.

ފުލުހުން ހާމަ ކުރެއްވި ގޮތުގައި މި ހާދިސާގައި ޕްރިޒަން އޮފިސަރަށް އަނިޔާއެއް ލިބިފައިނުވެއެވެ.