އައްޑޫ ސިޓީގައި މަސްވެރިން ކުރަމުން ގެންދިޔަ މުޒާހަރާ މިއަދު ނިންމާލާއިފިއެވެ.

އައްޑޫގައި މަސްވެރިން ކުރަމުން ދިޔަ މުޒާހަރާ ގިނަ ދުވަސްތަކަކަށް ފަހު މިއަދު ނިންމާލާފައިވަނީ، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންނަށް ދޭންޖެހި، ނުދެވި ހުރި ފައިސާ، ދޫކުރަން ފެށުމާ ގުޅިގެންނެވެ. 

މިފްކޯއިން ހާމަ ކުރި ގޮތުގައި، މިދިޔަ ބުރާސްފަތި ދުވަހާ ހަމައަށް މަސްވެރިންނަށް ނުދެވި ހުރި 53 މިލިއަން ރުފިޔާ ޖަމާކުރުމުގެ މަސައްކަތް ފަށައިފައިވާއިރު، އައްޑޫ ފިޝަރީޒް ކޮމްޕްލެކްސް ކައިރީގައި ފާއިތުވި 10 ދުވަހު މުޒާހަރާ ކުރަމުން އައި 15 އެއްހާ މަސްދޯންޏަށް ނިސްބަތްވާ މަސްވެރިން މިހާރު ވަނީ އެ ސަރަހައްދު ދޫކޮށް ދާން ފަށައިފައެވެ.

މިފްކޯގެ ޚަރަދު ކުޑަކޮށް މާލީ ޙާލަތު ރަނގަޅު ކުރުމުގެ ގޮތުން މިފްކޯއިން އިއްޔެ ވަނީ، މަސް ގަންނަ އަގުތަކަށް ބަދަލު ގެންނަން ނިންމާފައިވާކަންވެސް އިޢުލާން ކޮށްފައެވެ. އެގޮތުން، ދެން މަސް ގަންނާނީ ބައިނަލްއަޤްވާމީ ބާޒާރުގެ އަގަށާއި މަސް ގަނެ އެކްސްޕޯޓުކުރުމަށް ހިނގާނެ ޚަރަދުތަކަށް ބަލައި، ކޮންމެ ހަފުތާއަކު ކަނޑައަޅާ އަގެއްގައި ކަމަށް މިފްކޯއިން ބުނެފައިވެއެވެ. 

ހުޅުމީދޫގައި ހުންނަ އައްޑޫ ފިޝަރީޒް ކޮމްޕްލެކްސް (އޭއެފްސީ) ކައިރީގައި މަސްވެރިން މުޒާހަރާ ފެށީ މިދިޔަ މަހުގެ 19 ވަނަ ދުވަހު، މަސްވެރިންނަށް ދޭންޖެހޭ ފައިސާ ނުދީ ގިނަ ދުވަސްވުމާ ގުޅިގެންނެއެވެ. މި މުޒާހަރާގެ ސަބަބުން އެ ކޮމްޕްލެކްސް އިން ކަރަންޓު ކެނޑި، އޮޕަރޭޝަންތައް ހުއްޓުމަކަށްވެސް އައެވެ. 

ސަރުކާރުން މަސްވެރިންގެ ފައިސާ ނުދިނުމާ ގުޅިގެން އައްޑޫގެ އިތުރުން ދ. ކުޑަހުވަދޫގައިވެސް މިދިޔަ ހަފުތާތެރެ ވަނީ މުޒާހަރާ ކޮށްފައެވެ.