މިފްކޯއަށް ދޭ ލުއިތައް އަމިއްލަ ކުންފުނިތަކަށްވެސް ދޭންޖެހޭ ކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
މިއަދު މަސްވެރިކަމުގެ ދާއިރާއާ ގުޅޭގޮތުން ވާހަކަފުޅު ދައްކަވަމުން، ޤާސިމް ވިދާޅުވީ މިފްކޯއިން ކުލި ނުނަގާނަމަ، އަމިއްލަ ސެކްޓަރުން ވެސް ދައުލަތަށް ކުލި ދައްކަން ނުޖެހޭނެ ކަމަށެވެ. އަދި މިފްކޯއަށް ދެވޭ ސަބްސިޑީ އެހެން ކުންފުނިތަކަށް ވެސް ދޭންޖެހޭނެ ކަމަށް ޤާސިމް ވިދާޅުވިއެވެ.
ޤާސިމް އިތުރަށް ވިދާޅުވި ގޮތުގައި، ވޭތުވެދިޔަ ތިން ސަރުކާރުން މަސްވެރިކަމުގެ ދާއިރާގައި މަސައްކަތްކުރާ އަމިއްލަ ކުންފުނިތައް ކުރިއެރުވުމަށް އެކަށީގެންވާ މަސައްކަތެއް ކޮށްފައެއް ނުވެއެވެ.
އެގޮތުން އެމަނިކުފާނުގެ ކުންފުނި ހޮރައިޒަން އިން 250 މިލިއަން ރުފިޔާގެ އިންވެސްޓްމަންޓެއް ކޮށްފައިވާއިރު، ސަރުކާރުން ބޭނުންވާ ލޯނު ދީފައިނުވާ ކަމަށް ޤާސިމް ފާހަގަކުރެއްވިއެވެ.
އަދި ހަމަ އެހެންމެ، މަސްވެރިންނަށް އިންސެންޓިވް ދިނުމަށާއި، ބޭރު ފައިސާ އިތުރުކުރުމަށް އެކަށީގެންވާ މަސައްކަތްތަކެއް ކުރެވިފައިނުވާ ކަމަށްވެސް ޤާސިމް ވިދާޅުވިއެވެ.
މީގެއިތުރުން، ކުރީގެ ސަރުކާރުން ލޯނާއި އެހީ ދިނީ ވަކި ބަޔަކަށް ކަމަށް ތުހުމަތު ކުރައްވާ، އެމަނިކުފާނުގެ ވާހަކަފުޅުގައި ވަނީ މަސްވެރިކަމުގެ ދާއިރާގައި ހަމަހަމަކަމާއެކު އެންމެހާ ފަރާތްތަކަށް ފުރުސަތު ދިނުމުގެ މުހިންމުކަން ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
