އެމްޑީޕީ ސަރުކާރުން ލޯނުތައް ނަގައި ދައުލަތް ދަރުވާލި ގޮތުގެ ވާހަކަ ދެއްކުމުން އޭގަ މަތިޖަހަން އުޅުމަކީ އެއްގޮތަކަށްވެސް ކަމުދާ ކަމެއް ނޫން ކަމަށް ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ. 

ޤާސިމް މިހެން ވިދާޅުވެފައި ވަނީ، ރައްޔިތުންގެ މަޖިލީހުގެ މިއަދުގެ ޖަލްސާގައި ދައުލަތުގެ ދަރަންޏަށް ޒިންމާވުމުގެ ބިލަށް ބަހުސް ކުރައްވަމުންނެވެ.

އެގޮތުން ގާސިމް ވަނީ ކުރީ ސަރުކާރޭ ނޫނީ މި ސަރުކާރޭ ކިޔައި ސަރުކާރުގެ ބޮލުގައި ތުހުމަތުތައް އެޅުމުގެ ބޭނުމެއް ނެތް ނަމަވެސް،  މިހާތަނަށް އެންމެ ގިނަ ލޯނު ނަގާފައިވަނީ ނިމިދިޔަ އެމްޑީޕީ ސަރުކާރުންކަން ފާހަގަކުރައްވައި އޭގެ ސަބަބުން ދައުލަތަށް ބޮޑެތި ގެއްލުން ވެފައިވާކަން ފާހަގަކުރައްވާފައެވެ.

Advertisement

ޤާސިމް އިތުރަށް ވިދާޅުވީ، ރިޔާސީ އިންތިޚާބާ ދިމާކޮށް ފެނަކަ އާއި ސްޓެލްކޯއިން ހައްދެއް ނެތި، މީހުންނަށް ވަޒީފާ ދިން ކަމަށާއި، މަސް ދޯނިފަހަރުށް މަހަށް ދިޔަ ޒުވާނުންނަށްވެސް އެތަންތަނުން ވަޒީފާ ދިނުމުން މަސް ދޯނިތަކަށް މަހަށް ނުފުރިފައި ތިބި ކަމަށެވެ.

އެހެންކަމުން، މި ސަރުކާރުން ސަރުކާރުގެ ކުންފުނިތަކާއި، ސަރުކާރުގެ އިދާރާ ތަކުގައި ސިޔާސީ މަގާމު ތަކަށް ނެގުމުން އެވާހަކަ އެމްޑީޕީން ދައްކާނެ ކަމެއް ނެތް ކަމަށްވެސް ގާސިމް ވިދާޅުވިއެވެ.