ފަލަސްތީނުގެ ރައްޔިތުންނަށް އެހީވުމަށްޓަކައި ދިވެހިރާއްޖޭގައި ބޭއްވުނު ޚާއްޞަ ޓެލެތޯނުން ހޯދުނު 19 މިލިއަން ރުފިޔާ މިނިސްޓްރީ އޮފް ފޮރިން އެފެއާޒާ ހަވާލުކޮށްފިއެވެ.
ޓެލެތޯނުން ލިބުނު ފައިސާގެ ރަމްޒީ ޗެކު ހަވާލުކުރެއްވީ، މިއަދު ޕީއެސްއެމްގެ ސްޓޫޑިއޯގައި ބޭއްވުނު ޚާއްސަ ނޫސްވެރިންގެ ބައްދަލުވުމެއްގައި، ޕީއެސްއެމްގެ މެނޭޖިންގ ޑިރެކްޓަރ ޒީނާ ޒާހިރެވެ. ފޮރިން މިނިސްޓްރީގެ ފަރާތުން އެ ފައިސާގެ ރަމްޒީ ޗެކާ ހަވާލުވެވަޑައިގެންނެވީ ފޮރިން މިނިސްޓަރ މޫސާ ޒަމީރެވެ.
ފާއިތުވި ޖޫން މަހުގެ 12 ވަނަ ދުވަހު، ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން، ރާއްޖޭގެ އެހެނިހެން މީޑިއާތަކާވެސް ގުޅިގެން ބޭއްވި ޓެލެތޯނާ ބެހޭގޮތުން ވާހަކަ ދައްކަވަމުން ޒީނާ ވިދާޅުވީ، ޓެލެތޯންގެ ހުރިހާ ކަމެއް ވީހާވެސް ހާމަކަން ބޮޑު ގޮތެއްގައި ކުރިއަށް ގެންދިއުމަށް މަސައްކަތް ކުރާނެ ކަމަށެވެ.
މިގޮތުން، މިނިވަން އޮޑިޓަރެއްގެ ބެލުމުގެ ދަށުން ސިވިލް ސަރވިސް ކޮމިޝަން (ސީއެސްސީ) އިން ދެއްވި އެހީތެރިކަން ޒީނާ ޝުކުރުވެރިކަމާއެކު ފާހަގަކުރެއްވިއެވެ.
"ޕީއެސްއެމްއަށް އެ ޓެލެތޯން ކާމިޔާބު ކަމާއެކު ކުރިއަށް ގެންދެވުނީ ރާއްޖޭގެ ގިނަ މީޑިއާތަކެއްގެ އެހީތެރިކަމާއެކުގައި. ހާއްސަ ގޮތެއްގައި ވީޓީވީ، އަސްލުޓީވީ، ރާއްޖެ ޓީވީ، އެންޓީވީ، ސަންޓީވީ، ދިވެހިޗެނަލް، ޓީވީއެމް، އަދި ޕީއެސްއެމް ނިއުސް، ދިވެހިރާއްޖޭގެ އަޑު އަދި އޮންލައިން ނޫސްތަކުންވެސް އެ ޓެލެތޯންގެ މައުލޫމާދު ރައްޔިތުންނާއި ހަމައަށް ފޯރުކޮށްދިނުމަށް ވެދިން އެހީތެރިކަމަށާއި ދިން އެއްބާރުލުމަށް ޝުކުރު އަދާކުރަން،"
ޒީނާ ވިދާޅުވިއެވެ.
ޓެލެތޯނުން ލިބުނު ފައިސާ މިއަދު ފޮރިން މިނިސްޓްރީއާ ހަވާލު ކުރި އިރު، މި ފައިސާ، ފަލަޞްޠީނުގެ ރައްޔިތުންނާ ހަވާލުކުރުމަށް ހަމަޖެހިފައިވަނީ، ފޮރިން މިނިސްޓްރީ މެދުވެރިކޮށެވެ.
Advertisement
This content is created and paid for by advertisers and does not involve Voice Journalists
